Bye Tommy, welcome Ed!

Human sa mabangis ug nagbukal nga kainit sa pagpakigkombati sa matag kaatbang ug mga dumadapig sa tagsatagasa ka kandidato nga ilang gisuportahan, sama sa dulang NBA, may mga basketbolista nga na-injured, miaksiyon pagreklamo sa di makiangayong tawag sa reperi ug duna gyuy mga luha nga midailos sa kaapingan kay napilde. Unsaon, may home court advantage man gyud.

Ingon ini sab ang situwasiyon sa piniliay sa Pilipinas. Kon ang mga kandidato mopasilong ubos sa landong sa administrasiyon, bisag usa pa ka kahoyng tugas ang kaparang, tumbahon gyod kini sa naghaguros  suporta sa kinagamhanang lider sa nasod, diin maoy mopuli pagbarog ang iyang gi-endorso.

Sa ato pa, may home court advantage gyud kadtong mga kandidato kansang kamot giisa ni Presidente Rodrigo Duterte panahon sa ilang kampanya. Kay bisan kadtong mga politiko, kinsa nahumod sa makauulawng kontrobesiya ug gituohan sa kinabag-an nga dehado, midaog gihapon.

Vote buying? Ay, kanus-a ba kini mahanaw? Gani, dinhay mga nasakpan. Gipriso ba kaha sila, no?  Unya gipasakaag kaso?

Among kauban sa trabaho, taga Tacloban City, midalikyat gyud og uli sa ilaha kay naka-hearing nga tag P2,500 kuno ang presyo sa matag boto. Ug tungod kay lima sila sa ilang pamilya ang makabotar, aw, dakodako gyud ang masapi nila. Kana, kon moapil sila sa sayaw!

Dinhi sa ato, naghitak sab ang vote buying. Pero sa sekretong paagi. Labi na sa bukid. Dili kay kuwarta ray gipakamang. Hasta mga armadong grupo nga nakauniporme, nagbahisbahis sab. Ang mga tagbalay nakuyawan intawon.

Wala na lang manggawas. Wala na lang mamotar. Ang mga Voting Counting Machine? Ay, nagpagubaguba sab!

Ingon ini kahugaw ang atong eleksiyon. Apan kutob sa kinsay iproklamar sa Comelec nga maoy midaog sa piniliay base sa mga ballot returns nga ilang nadawat, ang ilang hukom mao na ang pinale ug dili na matuis.

Ang panag-atbang sa pagka mayor nilang Tommy Osmeña ug Edgar Labella, sikit kaayo ang laban. Pareha silang duha nga may precious jewels diha sa ilang pagpangalagad sa katawhan. Debuynas kaayo si Labella kay siya gyud ang migawas nga mananaog.

Ug kay pulos man sila mga bulawan sa akong panan-aw, gusto ko silang gakson uban ang pag-ingon: “Bye, Tommy! Welcome, Ed!”