Sakit nga Inadlawan sa Inahan

Gitunod na sa iyang kataposang pahulayan ang 16 anyos nga si Christine Silawan kinsa nabiktima sa linuog nga pagpatay sa Dakbayan sa Lapu-Lapu.

Sa Simbahan pa lang atol sa misa requiem natumog na sa luha ang pamilya sa dalagita ilabi na ang iyang inahan nga si Lourdes kinsa nakuyapan tungod sa tumang kasakit nga gibati.

Misamot sa pagbaha sa luha sa iyang inahan pagabot sa sementeryo diin nagminatay na sa paghilak si Lourdes hinungdan sa iyang pagkawad-an sa panimuot.

Gani gikinahang-lan pa siyang alsahon sa mga paramedics ug isakay na sa ambulansya apan wala na kini madala sa hospital.

Naningkamot intawon ang inahan nga mabalikan sa panimoot aron masud-ong sa kataposang higayon ang anak sa dili pa itunod sa iyang lubnganan.

Wala na kini tugoti pa nga masaksihan ang paglubong sa nitso tungod kay nakuyapan na usab.

Sakit nga dili hitupngan ug walay bisan unsa nga medisina ang makapahupay sa gibati sa inahan nga nagbangotan.

Labaw pa seguro sa sakit nga cancer ang nahiaguman ni Lourdes kay ang cancer naa pa may remedyo nga tambal apan sa kasub-anan bugtong ang hustisya ang makapahupay sa ilang kasakit.

Adlawng natawhan pa gyud ni Lourdes dihang gilubong ang iyang pinangga nga anak.

Kini ang labing subo nga inadlawan nga nadawat sa usa ka inahan kinsa mihatod sa iyang anak ngadto sa lubnganan.

Sa paghatod sa kataposang pahulayan sa biktima giduyogan kini sa bagang duot sa mga tawo nga miambit sa kasakitan sa nahitabo kaniya.

Ang tanan nagsinggit og hustisya nga maangkon sa dalagita, apan dungan sa paglubong ni Christine mao usab ang pagkalingkawas sa 17 anyos nga akusado sa krimen.

Kini human gitugotan sa piskalya ang omnibus motion sa abogado sa depensa nga ipagawas ang iyang kleyente tungod sa mga technicality sa pagdakop niini sa National Bureau of Investigation.

Daw nahugno ang kalibutan sa tagtungod sa biktima dihang nasayran nga gi release na ang akusado, ang iyaan ra ni Christine ang mipadayag niini sanglit wala pa mahinabi si Lourdes nga delikado pa ang iyang emotion.

Bisan gustohon man nila nga magpabilin sa home care facility o sa prisohan ang akusado apan gikinahanglan mopatigbabaw ang legal process.

Wala hinoon kini nagpasabot nga napurnada na ang kaso, magpadayon gihapon kini sa higayon nga maresolbar sa piskalya kun ugaling dunay probable cause masang-at sa korte nga maoy moisyu og warrant of arrest.

Apan kun masuta sa piskalya nga walay basehan  ang kaso posible usab nga mabasura.

Hinaut mopatigbabaw ang kamatooran ug mapanubag kun si kinsa ang tinood nga kriminal, kun ang 17 anyos, aw iya kining bayaran sa balaod apan kun dili man gani angayan nga pangitaon sa mga otoridad ang tinood nga kriminal aron masilotan.