Kinsay hawod: Duterte o Comelec?

Dugay nang mimandar si Presidente Rodrigo Roa Duterte sa hingtungdang ahensiya sa gobiyerno nga ipagawas ang listahan sa mga narco-politicians aron mahibaw-an sa mamotaray kinsa nilang  mikandidato ang nahilambigit niining illegal drugs business kang kansang kinabuhi nahisama sa balili, diin bisag unsaon sa pagpatay, imbes modiyotay hangtod mapuo, nagkaanam hinuon kadaghan ug milipang.

Unsaon, ini’g larot sa usa o duha, may upat o sobra man ang mopuli. Kamatuoran nga maoy nakahatag og dakong babag sa tinguha ni Duterte pagpuo sa hingpit ning kamandag sa illegal drugs nga maoy nakapadulom sa mahayag nga kaugmaon sa mga batan-on.

Si DILG Secretary Eduardo Año miingon, nga i-release ngadto sa publiko ang maong listahan sa dili pa magsugod ang adlaw sa pagpangampanya sa mga lokal nga kandidato, Marso 30, alang ning umaabot Mayo 13 nga piniliay.

Kini human may pipila ka komentarista  ang naningil, hain na ang gisaad ni Duterte nga ibandilyo sa tibuok nasod ang listahan sa mga narco politicians.

Apan mi-entra sa eksena si Comelec Commissioner Rowena Guanzon, kinsa mipahimangno sa gobiyerno nga kinahanglang paylan og tukmang kaso ang hingtungdang narco politicians, nungkang iduhig lang sa kaulawan ang ilang pangalan.

Midugang pagpahinumdom si Guanzon sa mga otoridad, sa dili magpataka’g hingalan sa kandidato nga usa ka narco politicians, ilabi na kun wala pay kiha nga gisang-at batok niini.

Hinuon, giklaro ni Guanzon, nga ang Comelec mahimong motaktak sa usa ka politiko gikan sa nahuptang serbisyo kon makonbikto kini sa kaso nga nalambigit sa moralidad ilabi na sa illegal drugs.

Perog listahan lang kuno sa mga narco politicians, unya walay kiha, ay, ibali-wala ra kini nila.  Konbikto?

Paylag kaso? Haskang dugaya mahuman niini, Ma’am Rowena. Labi nag druglord imong kontra, haskang lisora pildehon.

Ngano? Kay daghan silag kuwarta nga makapausab sa timbangan sa atong hustisya nga ang dahili adto pabor nila.

Isip usa kanhi ka prosecutor si Duterte, siya very knowledgeable na bahin niini. Mao nga dili gyud siya kadiktahan kon unsay iyang hukom: ‘Ipadayon ba niya ang pagpa-release sa listahan sa narco politicians, o magpapugong siya sa pahimangno sa Comelec?’

Dinhi atong mahibaw-an, kinsa nila ang hawod.