Kinsay sad-an sa trahedya?
Kapait sa sangpotanan sa kontrobersiya nga nagsugod lang sa managlahing baruganan, bisan pilay matangtang sa trabaho:
150 sa Big Hotel ug Big Hotel Suites suma ni Ken Derrick Ngo, chief executive officer sa Travelbee Management Corp., ang tagduma sa duha ka hotel, dihang gitunolan sila sa closure order sa Mandaue City Hall niadtong Pebrero 27; o
300 sa Big Hotel suma ni Roderick Ngo sa Cenore Corporation, ang nag-abang sa luna nga nahimutangan sa hotel, dihang gipahibawo niya si Mayor Luigi Quisumbing nga tak-opan nilang hotel sa Hunyo ning tuiga.
* * *
Di kapanghunaw og responsibilidad ang pamunoan ni Quisumbing.
Kay di man unta kinahanglang may makulban og kaldero sa paghusay sa ilang nakit-an nga kahiwian sa pagbanos sa Cenore sa pag-abang sa 1.4 ka ektaryang luna sa North Reclamation Area nga gitugyan ngadto sa Katumanan Hardware sa duha ka buwag nga kontrata niadtong 2007 ug 2012.
Di katabang sa ilang kawsa ang kapakyas pagpakita og ebidensiya sa mga pasumbingay nga nakakuwarta si kanhi Mayor, karon Kongresista, Jonas Cortes sa iyang pagtugot sa pagbanos sa Cenore sa way pagkonsulta sa mga konsehal.
* * *
Maapil sab sa tulisok sa panghitabo si Cortes. Ang iyang pag-insistir nga wa kinahanglana ang pagdason sa konseho sa kauyonan gisukwahi sa duha ka insidente:
Una, ang pangangkon ni Bise Mayor Carlo Fortuna nga sa paglingkod nilang Quisumbing niadtong 2016 nagsige nag apura ang mga sinugo ni Cortes nga i-ratify sa konseho ang kauyonan sa Cenore ug Katumanan; ug
Ikaduha, ang pag-ratify sa iyang alyadong mga konsehal sa kauyonan niadtong Pebrero 28, unom ka tuig human sa pinirmmahay.
* * *
Bisan ang Cenore di makapangangkon nga inosenteng biktima sa politikanhong away nilang Cortes ug Quisumbing:
Nangangkon si Quisumbing nga niadto pang 2017 nga nagsige og apura ang Cenore og ratification apan nibalibad dihang giawhag sa City Hall sa pagsud og bag-ong kontrata; ug
Nisuwat ang Cenore sa mga konsehal niadtong Pebrero 19 ning tuiga alang sa dinalian nga ratification sa way paghatag og kopya, bisan tungod na lang sa sugo sa maayong pamatasan, nilang Mayor Quisumbing, nga nitanyag pakigsabutsabot og bag-ong kontrata, ug Bise Mayor Fortuna, nga maoy presiding officer sa Mandaue City Council.
* * *
- Latest
