Expanded maternity leave gikahadlokan

Mihakot og nagkadaiyang reaksiyon ang pag-inat sa naandang 60 days maternity leave law ngadto sa 105 days with pay alang sa mga working mothers nga bag-ohay lang gipirmahan ni Presidente Rodrigo Roa Duterte. Busa otomatik nabag-o sab ang pangalan: gikan sa Maternity Leave, ngadto sa Expanded Maternity Leave (EML) na.

Pagkasuwerte sa mga magtiayon karon, kinsa tabunok pa ang umahan sa asawa, diin human itisok sa bana ang binhi sa ilang pagminahalay, paglabay’g siyam ka bulan, ila nang mahagdaw ang bunga sa ilang gugma – ang kusog nga uha sa bata, kang kansang tiyabaw naglarawan kun unsa kapait sa kalbaryo ang giagian sa inahan diha sa iyang pag-inutong sa delivery room ug maoy bug-at hinungdan, nahimugso kining 105 days expanded maternity law.

Si Joan, usa ka guwapang misis, kauban nako sa trabaho, mitug-an nga iyang mister, pagkasayod ning maong balaod, nangablit niya: “Mahal, puwede na pun-an ang 9 years old tang kinamanghoran!”

Haskang nakabalibad sa daw artistang empleyada: “Uy, Lor, di na ko! Lisod ug sakit kaayo ang pagpagawas sa bata, no! Then, may sakit na akong likod. Ug 39 years old na pud ko.”

Tungod sa EML, ang bana nalipay.  Ug sige nag panguhit. Pero asawa nahadlok. Kay nakaduha na baya sila. Di na siya gustong pun-an! Laing matahom empleyada, gisukna ko unsay iyang reaksiyon bahin sa EML? Niay iyang tubag:

“Nahadlok ko sa maong balaod, Boss. Kay basig aduna na hinuoy sex discrimination diha sa pagpangaplay’g trabaho. Basin dili na modawat og mga babaye ang employer. Gani, niadtong 60 days maternity leave pa lang ang ma-avail, gipapirma man mi’g waiver nga samtang contractual employee pa, kinahanglan di gyud mi mabuntis. Otherwise, mapapha mi sa work.”  Dili lady personnel ray nabalaka. Hasta employer sa mga dagkong tindahan, diin kadaghanan mga babaye ang tindera. Dako kaayo ning suliran.

Mag-unsa na lang, kun magdungan pagpanganak ang mga babaye nilang empleyada? Mangita gyud sila’g ika-substitute. Meaning, madak-an gyud sila sa gastos.

Resulta? Aw, mapugos sila sa pagpamahal sa ilang baligya, diin kitang mga consumers maapektohan usab.

Busa, sakto gyud ang gisulti sa ekonomista kong higala: nga kining expanded maternity leave, wala gikalipay sa kadaghanan. Kondili, gikahadlokan!