Bentaha gyud kun lone district

Aprubado na gyud sa Kongreso ang House Bill 8511 nga maghimo sa Mandaue City isip “Lone Legislative District.” Iduso na kini sa Senado aron aprobahan sa mga senador.

Kun mahimo na gyud kini nga balaod, daghang kaayohan ang maangkon sa taga Mandaue City.

Ngano man? Kay ang pundo gikan sa nasudnong kagamhanan, mapunta ra man sa Mandaue City. Nagpasabot nga ang kapin sa 365,000 ka lumolupyo sa maong siyudad maoy makaangkon og daghang grasya.

Pagkakaron, ang Mandaue City, sakop pa sa ika-unom nga congressional district sa Sugbo, uban sa lungsod sa Consolacion ug Cordova.

Ang taga Mandaue City angay’ng magpasalamat kanila ni Kongresista Jonas Cortes ug ni Cebu City South District Congressman Rodrigo Abellanosa nga maoy miduso og balaudnon nga maghimong “lone district” sa Mandaue City.

Base sa rekord sa Kongreso, si Cortes maoy miduso sa House Bill 4117 kaniadtong Oktubre 2016, ug si Abellanosa miduso usab sa House Bill 4523 pagka Nobiyembre 2016.

Ang duha ka balaudnon nila ni Cortes ug Abellanosa, gihiusa ngadto sa House Bill 8511.

Mao na ang nakanindot kay sila si Cortes ug Abellanosa, nagtinabangay pagsugyot sa maong susama nga tinguha, ug nakumbinser gyud nila ang ilang kaubanang mga kongresista.     

Daghan gyud kaayong benepisyo nga makuha ang Mandaue City kon hingpit na kini nga mahimong “lone congressional district” ug makapaabot kita nga mosamot ang kalamboan sa maong siyudad.

* * *

Usa ka amigo nako sa Cebu City Police Office (CCPO) miangkon nga wala sila’y gihimo batok sa mga illegal gambling dinhi sa dakbayan. Abi ninyo og unsay rason?

Gihimo nila nga mga “gatasan” ang mga operator niining maong mga ilegal nga sugal, sama sa illegal swertres, video karera ug moli-moli.

Dili hinuon ko motuo sa giingon sa akong amigo nga ang kuwarta kuno nga matigom gikan sa mga tigpasiugda sa ilegal nga sugal, gigamit nila sa panggasto sa paghimo og operation. Bakak kaayo na.

Ang tinuod mao nga ang dakong kantidad nga makuha sa kapolisan gikan sa mga operator sa illegal gambling, gibahin ra nila.

Mao kini ang rason ngano nga gipasagdan ra ang mga mikatap nga illegal gambling sa kabarangayan, ilabi na sa Ermita, Suba, Pasil, Duljo-Fatima, Sawang Calero, Tejero ug Calamba.

Nahibaw-an nako kini gikan sa mga tawo nga mipahibawo nako. Naluoy ko sa akong mga informers nga wala gyud tawon mahatagi og pagtagad ang ilang mga kasayuran nga gihatag.

Unta, mohatag na og pagtagad si Senior Supt. Royina Garma aron imatuod niya nga wala siya’y labot sa binuang sa pipila niya ka badlungon nga sakop.