Abswelto

Giabswelto sa Special Division sa Sandiganbayan si kanhi Senador Ramon Revilla Jr. sa kasong plunder.

Ang first division hinuon sa Sandiganbayan mikonbikto nilang Atty. Richard Cambe ang chief of staff sa kanhi senador ug sa negosyante nga gitumbok nga pork barrel queen nga si Janet Napoles.

Reclusion perpetua kon pagkapriso hangtud sa 40 ka tuig maoy ilang silot ug gimanduan sila nga iuli ang P124 milyones nga giingong kickback nga ilang nadawat sa anomalosong paggasto sa kapin sa P224 milyones nga pork barrel ni Revilla.

Tulo sa lima ka mga justices nga naglangkob sa special division, apil nila ang Sugboanon nga si Justice Geraldine Faith Ycong, ang mibotar pabor sa pag-abswelto ni Revilla.

Ang labing bug-at nga sukaranan sa korte pag-abswelto ni Revilla mao ang kapakyas sa mga prosecutor sa Ombudsman pagmatuod nga apil si Revilla sa anomaliya bisan pa kun gikan sa iyang opisina ang pundo.

Ang nahimong yawe sa pagkahugno sa kaso sa gobiyerno batok ni Revilla mao mismo ang testigo sa estado nga si Marina Sula.

Si Sula kanhi kawani ni Napoles ug usa sa mga nahimong akusado sa kaso. Apan natangtang siya sa listahan sa mga akusado dihang gipaubos siya sa Department of Justice sa Witness Protection Program niini.

Ambot apil ba sa plano aron masiguro nga maabswelto si Revilla, kinsa nahimong usa sa mga presidential timbers niadtong 2010, kalit nga milubad ang pamahayag ni Sula.

Dihang natangtang na siya isip akusado, giusab ni Sula ang iyang pamahayag ug giabswelto si Revilla.

Maoy giduot ni Sula ang whistleblower nga si Benhur Luy. Sa iyang pamahayag nagkanayon si Sula nga dili si Revilla maoy nagpirma sa mga dokumento sa transaksiyon. Matud niya nga gi-forge o gikopya ni Luy ang pirma sa senador.

Hinaot nakakat-on og leksiyon ang gobiyerno sa maong kaso. Angayang bantayan sa DOJ ang ilang mga testigo ug sigurohon nga dili molubad ang ilang testimoniya.

Angayan sab nga gukdon sa kagamhanan si Sula sa maisip nga paglingla niya sa gobiyerno aron masalbar gikan sa kasong iyang giatubang.

Kana kon dili sab kunsabo ang kagamhanan sa nahitabo. Dili man gud kalikayan ang mga pagduda tungod kay dinhi sa atong nasud wala pay dagkong politiko nga nabalhog sa prisohan gawas lang og kritiko ka sa administrasyon.