Magtiayon nga nagbuwag gustong magpirmahay og kasabutan

Dear Atty. Divine:

Minyo ko sud na sa lima katuig ug aduna mi usa ka anak.  Dugay na gyud ko nga nag-antos sa among marriage kay ang akong bana mangulata tungod sa iyang ka seloso.

Last year wa na gyud ko kaagwanta ug miuli ko sa balay sa akong mga ginikanan kuyog sa akong anak. Ang akong mama mitambag nako nga magpirmahanay nalang kuno mi og kasabutan sa akong bana adto sa among barangay nga dili na mi maghilabtanay.

Naa ko nagtrabaho karon sa gobiyerno, ang akong pangutana kon  valid ba kon magpirmahanay mi og kasabutan?

Daghang salamat.

Mira

* * *

Dear Mira:

Bisan pa kon boluntaryo ninyong gipirmahan ang inyong kasabutan nga magbuwag na mo og dili na mo maghilabtanay, dili gihapon kini valid tungod kay misukwahi kini sa atong balaod.

Ang atong balaod nagkanayon nga way laing makaputol sa kaminyuon sa magtiayon gawas lang sa korte pinaagi sa pagpa annul niini.

Sa ato pa, samtang dili pa ma annul ang inyong marriage magpabilin kamong  minyo ug dili kamo mamahimong makigrelasyon og lain or else mapasakaan mo og kaso ilabi na gyud ikaw nga anaa nagtrabaho sa gobiyerno ug ang inyong kasabutan dili kana nimo magamit nga depensa kay dili man kana valid.

Busa ang maayo nimong buhaton kon wa na gyuy chance nga magkabalik pa mo mao ang pagadto og abogado aron imong ipa evaluate kon aduna ka bay basihan sa pag-file og Annulment of Marriage. Thanks and God bless.

Atty. Divine

* * *

Alang sa inyong pangutana, ipadala lang sa Legal Corte sa Banat News  sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.