Tsunami kaniadto sa Sugbo

Apas sumpay sa akong lindog niadtong Miyerkules kalabot sa pagpangandam sa tsunami, nahinabi nako ang opisyal sa Philvolcs, mao kuno kini ang angayan nga hatagan og pagtagad sa aspeto sa disaster preparedness.

Kini ilabi na nga napalibotan kita sa dagat ug halapad usab kaayo ang patag nga luna diin nakatukod ang mga pinuy-anan sa katawhan.

Pareha ra kuno og sitwasyon didto sa Palu City sa Sulawesi island Indonesia nga gibanlas sa tsunami.

Ang maong dapit anaa sa sudlonon diin gipatung-an lang og mga yuta o adunay gamay’ng agianan sa tubig sama sa atoa diri sa Mactan channel.

Apan dili diay garantiya nga ang salipod nga isla makapugong sa pagsaka sa dagat.

Mas delikado gani kuno kay ang ma- imbudo man ang tubig hinungdan nga motaas og kusog usab ang banlas niini ngadto sa mga estraktura.

Ang nahitabo didto posibleng mahitabo usab sa atoang dapit, gani base sa historical data sa Philvolcs niadtong Enero 28, 1922 nakasinati na og ingon niini ang Sugbo partikular na ang Mactan.

Limitado ang impormasyon mahitungod niini apan duna kunoy mga indikasyon nga nahitabo ang tsunami kay naa may mga nangalarot nga corals.

Simbako mahitabo, unsa man kita ka andam ang atong kagamhanan unsa man ang mga lakang?

Sa Mactan ugaling magtukod og evacuation center asa man ibutang nga sigurado man gyud nga masanapan ang patag nga luna nga gipuy-an sa katawhan.

Unsaon man sa pagkalingkawas kon modasmag na ang tsunami? Mopakusog og dagan sa sakyanan padung sa bukid apan dili man kalihok sa kahuot sa traffic.

Bitaw sa? Unsaon man pagsagang ang pwersa sa kinaiyahan?