Hulga sa kudeta

Unsa ba gayud ka dako kining hulga sa pagpalagpot kang Presidente Rodrigo Duterte?

Mismong si Duterte mialegar sa niaging mga semana nga nagkumboya kuno karon ang oposisyon, mga rebeldeng sundalo ug mga rebeldeng komunista aron pagsipa kaniya gikan sa katungdanan.

Ug aduna usab kunoy plano ang militar nga maglusad og kudeta batok sa administrasyon ni Duterte nga gitawag og “Red October.”

Ang maong termino naggikan sa dakong rebolusyon didto sa Russia kaniadtong 1917.

Apan matud pa sa kapolisan, walay dakong hulga ang kagamhanan sa pagkakaron.

Gani mismong si Director-General Oscar Albayalde, ang hepe sa Philippine National Police, ang miingon nga walay igong basihan ang “Red October.”

Wala man siguroy igong rason ang mga sundalo nga mag-alburoto batok sa gobiyerno niining panahona.

Kon kinsa man gani ang nagsugnod niana nga intriga, klaro nga bunga kana sa pulitika.

Aduna bay dakong sala ang administrasyong Duterte sa katawhan nga posibleng hinungdan sa kudeta?

Sa akong tan-aw wala. Hinuon, dili usab nato malikayan nga adunay mga sektor nga wala mahimuot sa ubang palisiya ug programa ni Duterte.

Maayo karon ang relasyon sa gobiyerno ug sa militar tungod sa mga programa nga gipatuman sa administrasyon nga nakapalambo sa pwersang kusog sa nasud.

Kini sama sa pagpataas sa mga sweldo sa kasundalohan ug kapolisan ug uban pang mga benepisyo.

Dili siguro bogo ang kadagkoan sa militar, ug mismong ang tibuok organisasyon, nga magawngan sa renda sa pulitika ug mosugot na lamang nga mahimong mga itoy niadtong gustong molumpag sa kagamhanan.

Sa pagkakaron, wala koy nakitang dakong rason nga makapaingganyo sa kasundalohan nga mobiya sa gisumpaan nilang tahas paggakos sa Konstitusyon aron lamang paglusad na usab og kudeta batok sa kagamhanan.

Nakasinati na kita og mga kudeta kaniadtong mga administrasyon ni Cory Aquino ug Gloria Macapagal-Arroyo. Ug wala gyud kini maayong nahatag sa nasud kondili ang pagkahagsa hinuon sa ekonomiya.

Hinuon kining mga hungihong sa kudeta klaro nga kabahin sa mga lakang sa pipila pagdestabilisar sa gobiyerno.

Dula kini sa pulitika nga gipangunayan niadtong pipila nga anaa sa oposisyon, ilabina nga lider kaniadto sa mga rebeldeng sundalo ang nag-unang kritiko ni Duterte.

Walay rason mga mokubit niini ang militar.

Gani sa mga panghitabo karon, walay sinyales nga gipul-an na ang kasundalohan ug andam na usab silang momartsa sa kadalanan aron pag-ilog sa gahum.