Drainage limpyohan

Nalipay ko kay adunay mga kawani sa Department of Engineering and Public Works (DEPW) nga nanglimpyo sa drainage system sa dalan V. Gullas, kilid diri sa among opisina sa The Freeman.

Daghang lapok ug mga sagbot ang ilang nakuha gikan sa tinak-opan nga kanal daplin sa karsada. Nindot kini nga pagpangandam sa atong dakbayan sa nagsingabot na nga ting-ulan.

Kining among dapit diri sa D. Jakosalem eskina V. Gullas, mao gyud ang kanunay’ng malunopan kon magbunok ang kusog nga ulan, ilabi na nga mosuyla ang tubig gikan sa sapa nga gitawag og “Estero Parian.”

Ang “Estero Parian” mao kini ang sapa nga anaa mag-agi ilawom sa dakong department store sa Colon, unya nagsubay kilid sa among building sa Freeman ug ngadto na sa Pier Tres.

Gibalikbalik nako sa paghisgot dinhi nga ang DPWH naghimo og bag-ong sapa nga milagbas sa dalan Colon, sa paninguha nga ang tubig nga gikan sa drainage system sa dapit sa Barangay Kamagayan, moderitso na pag-agos sa sapa diri tungod sa among building.

Sukad sa pagkahuman sa maong sapa nga gigastohan sa DPWH og subra sa P50 milyones, wala pa makabunok ang kusog nga ulan, ug wala pa masulayi kon hingpit ba kini nga makasulbad sa baha ug lunop diri sa downtown area.

Buyno, atong lauman nga paspasan unta sa DEPW ang pagpanglimpyo sa ubang drainage system dinhi sa dakbayan aron nga malikayan na ang problema nato sa paglunop.

Awhagon usab nako ang mga kawani sa DEPW nga palawman unta nila ang gamay’ng sapa nga gikan sa Barangay Day-as ug molagbas sa Sikatuna Street paingon na sa T. Padilla river.

Tan-awa ra gud ninyo gikan nianang gamay ug karaan nga taytayan sa dalan Sikatuna, tupad nianang nagnegosyo og puthaw, kon nag-andar lang ang maayo ninyo nga panghunahuna, makita ninyo kon unsay maayo nga himoon.

* * *

Uy, wala man diay matuman ang gipasiatab ni kanhi konsehal Nida Cabrera, ang pangulo sa Cebu City Community Environment and Natural Resources Office (CCENRO), nga dili na kolektahon ang mga basura nga wala mabuwag kadtong mga madugta ug dili madugta.

Unsa man diay to, pasiatab ra kutob ma’am? Mao na nga dili gyud motuman ang katawhan kay wala ma’y strict enforcement sa balaod. Karong pipila ka buwan, kini si ma’am Nida, molansar na sab pagbalik ug lain na usab ang modumala sa CCENRO. Mopasalig na sab.

Sa dili ka pa mobiya sa pwesto ma’am, nindot nga magbilin ka og sampol pinaagi sa pagsilot sa mga dili motuman sa balaod.