Cinnamon sa dili pa mamahaw (1)

Ang karaan natong kultura, puno sa bahandi sa mga mapuslanon nga medisinang natural, nga wala na kaayo mahibaw-i sa atong henerasyon karon.

Kining mga remedyo, dili lang pang-alibyo sa mga laygay nga sakit, kon dili, hasta sab sa pagminten sa kahimsog sa atong panglawas.

Usa sa mga ingrediyentes, nga labing girekomendar nga konsumohon nato kada adlaw, mao ang cinnamon. Nagbaton kini og pangontra sa implamasyon, nga makapaalibyo gikan sa mga iritasyon ug panakit.

Ang cinnamon, giisip nga usa ka lamas nga dugang palami sa mga pagkaon, nga may talagsaong aroma nga humot, medyo may pagkatam-ison nga tagamtamon ug makapagana sa imong maayong pamahaw.

Ang pinulbos nga cinnamon, sagad gigamit sab ni nga pangsagol sa mga produkto, sama sa pan, desserts, suplemento ug uban pa nga mga pahimsog nga ilimnon.

Kini aron sa pagdugang nga maagni sa aroma nga makahimsog, tungod kay ang cinnamon, naghatag og dasok nga tinubdan sa potassium ug fibers, ug nagbaton sab ni og igo nga gidaghanon sa iron, aron sa ingon kanunay kita nga piskay kon kada adlaw ato kini nga konsumohon.

Daghang eksperto kabahin sa kahimsog, naghiusa karon sa pagrekomendar sa pagkonsumo og cinnamon. Unsa pa man diay ang katibuk-ang mahatag nga benepisyo niini?

Kon magsugod ka na og konsumo sa cinnamon kada buntag, nga dili pa masudlan ang imong tiyan, ania ang mahitabo sa lawas mo.

* Makapalig-on sa trabaho sa sistema sa pagtunaw sa kinaon.

* Makontrol sa normal ang lebel sa bloodsugar, ilabi na sa gi-diabetes.

* Mapugngan ang pagtubo sa selyulang kanser nga dili mokatap sa lawas.