Tukmang pag-display sa national flag

Magpahinumdom na sab ko nga ang atong nasudnong bandera dili adorno. So, gikinahanglan ang tukmang pagtahod sa atong pag-display niini.

Ang mga motor vehicles, lakip ang mga motorsiklo, maoy sagad magpataka lang og pasundayag sa bandera, ilabi na nga nagsingabot na ang Independence Day karong Martes. Ang tukmang pag-display sa atong nasudnong bandera, mao kini: Una, kinahanglang anha kini ipahimutang sa right side sa driver.

Ang kasagaran, tungod kay ang antenna sa radyo anaa sa walang bahin, ang bandila anha usab ibutang sa left side sa sakyanan.

Ikaduha, mahimo nga anha ibutang sa sentro, o sa tunga sa hood sa sakyanan, but never to the left side.

Ikatulo, dili angay’ng ibutang sa likud sa sakyanan ang bandera. Sagad nga masayop niini mao ang mga motorsiklo kay wala’y kabutangan sa atubangan.

Ikaupat, kon ibitay gani, o ipilit sa bungbong, ang blue kinahanglang anaa sa wala, kon mag-atubang ka sa gitaoran sa bandera.

Akong usbon, sa mga sakyanan, never to the left side or at its back, kon dili, either sa right side or at the center of the vehicle.

* * *

Pagkakaron, wa na mi problema sa basura. At least kami diri sa Sitio Canaas (tunga-tunga sa mga subdivision Guadalajara ug Buena Hills), Guadalupe. Efficient na kaayo. Lately, kada-adlaw ang pagkolekta, ug nakakat-on na sab mi pag-segregate.

Problema lang usahay kay kami diri sa balay dili mahibawo inig-agi sa garbage truck padulong sa unahan. Dili kami makapangandam nga inigbalik nila, ila mi nga malabyan. OK lang. Tagsa ra man pud hinoon ning mahitabo. Ug samtang wa na mi problema sa basura, ang nagkagrabe ang pagka-inutil sa MCWD. Usahay tulo ka adlaw nga walay agas. Kon moagas man, hinay kaayo ang pressure nga dili makapaagas sa tangke. Sige na mi’g sag-ob. Pastilan!

* * *

Matud dinhi, ang Senado mogasto og P10 bilyones alang sa bag-o nilang building ug mga opisina. Ngilngiga nila no? Usa ka kolumnista sa nasudnong mantalaan nakapangutana: “Has our Senate, and maybe even our nation, gone mad?” Literally, nabuang na ta?

Ang labing mahalon nga engineering ug construction firm sa tibuok kalibutan maoy mohimo sa architectural design. Wala sila mosalig sa kaugalingon natong mga engineer ug mga architect.

Kining maong laraw, sa hilom giaprobahan sa mga senador. Pastilan, dili man sila maikog sa nag-ilaid nga mga Pinoy nga maoy nagsweldo nila ug maoy mo-um-om ning dakong galastoan?

Luho kaayo ang design sa building. Makaingon ta nga wala dinhi, wala didto. Hayahaya nila no?