Andam na ang mga eskwelahan

Dali ra kaayo miligid ang panahon ug hapit na mahuman ang bakasyon kay moabli na man usab ang klase sunod semana. Karong Hunyo 4 maoy pagbukas pagbalik sa mga publikong tunghaan.

Gilusad sa Department of Education sugod niadtong Lunes ang Brigada Eskwela diin nagtinabangay ang mga magtutudlo, ginikanan ug mga tinun-an sa pagpanglimpyo sa eskwelahan.

Gitumong kini aron dili na mabalda ang unang adlaw sa klase sa mga tinun-an, ug deretso nga klase na gyud. Lahi kaniadto nga sa unang adlaw sa klase, manglimpyo pa ang mga tinun-an, hinungdan nga ang uban dili una mosulod sa klase kay maglikay nga makapanglimpyo, apan wala na kini mauso karon.

Wala na’y katarungan nga mopalta sa klase ang mga estudyante kay andam na man ang tanan. Kadtong mga ginikanan nga wala makaapil sa launching sa Brigada Eskwela may higayon pa hangtud sa Biyernes nga moabag sa paglimpyo, pagpamintal, o unsa pa nga bulohaton sa eskwelahan.

Usa sa gipahinumdom sa kadagkoan sa DepEd ngadto sa mga school administrators nga gidili gyud ang pagkolekta sa bisan unsa nga amotan gikan sa mga tinun-an sa tunghaang publiko.

Libre ang edukasyon ug dili mahimong balibaran ang mga bata nga mopa-enroll, bisan og kulang ang mga gikinahanglang dokumento kay mahimo man nga isunod na lang ang mga papeles.

Hangtud sa Hulyo 15 nga ang DepEd modawat og enrolee, ilabi na kadtong duna’y nasinati nga mga kakulian. Apan miawhag ang DepEd nga kon mahimo lang, ipa-enroll gyud ang mga bata sa dili pa mosugod ang klase aron mapahiluna na sila daan.

Samtang pahimangno usab sa mga ginikanan nga likayan ang pagpamalit og school supplies nga peligro sa panglawas sa mga bata.

Ayaw himoa nga basehanan ang kabarato sa school supplies kay sagad ang ingon niini nga produkto dunay sagol nga kemikal nga makadaot sa panglawas sa mga bata.