Kadaot sa kalikopan

Gituohan sa mga lokal nga opisyal nga makabenepisyo ang Sugbo sa pagsira unya sa mga beach resorts sa isla sa Boracay. Kini tungod lagi kay gitan-aw nga magpanon ang mga turista dinhi sa atong lalawigan, Bohol ug uban nga tourist destinations sa Central Visayas.

Nangandam na ang Department of Tourism sa rehiyon tungod kay usa ang Sugbo sa gituohan nga punterya sa mga turista, ilabi na sa langyaw nga mga bisita, sa umaabot nga mga bulan. Mismo si Gobernador Hilario Davide III ang miawhag sa mga turista sa pagduaw sa mga tourist spots sa probinsiya.

Nakadesisyon man gud ang national government nga sirhan ang mga beach resort sa Boracay tungod sa mga environmental issues. Sulod sa unom ka bulan, magpuasa unya ang maong isla sa mga turista nga maoy nagpatuyok sa ligid sa ekonomiya niini.

Gibanabana nga moabot sa $2 bilyones ang salapi nga mawagtang sa mao nga isla. Pagkadako sa mao nga kantidad. Mao na nga miapelar ang katawhan sa Boracay sa national government nga ikonsiderar una ang desisyon niini tungod kay sigurado gayud sila nga makulban sa kaldero.

Apan dili nato mabasol ang national government sa lakang niini pagsira sa mao nga isla. Sa pagsusi sa Department of Environment and Natural Resources, dako nga kadaot ang nahimo sa wala’y regulasyon nga operasyon sa mga beach resorts didto.

Hagbay ra kining mga kalapasan nga nahimo sa mga beach resort didto sa Boracay. Sukad sa pipila ka dekada, wala gayud madiskitahi ang ila nga mga kasaypanan. Apan ang dako nga pangutana kon ngano nga karon lang miaksiyon ang kagamhanan batok niini.

Nagpasabot ba kini nga namaroan sa mga resort didto ang nanglabay nga mga administrasyon? O, basin usab nga migamit sila og salapi aron lagi sa pagtingal sa otoridad sa panahon sa mga inspeksyon aron lagi makapadayon sila sa ila nga operasyon.

Hinuon, sa lain nga bahin, leksiyon usab kining pagsira sa kagamhanan sa mga beach resort sa Boracay. Klaro ang ila nga paglapas sa balaod sa kalikopan ug angay lang sila nga sirhan aron nga dili na mograbe ang kadaot nga dala sa ilang ilegal nga operasyon.