Ambot kun mosaler

Siyam ka bulan sukad siya mitungtong sa Palasyo sa Malakanyang, gihapak og impeachment complaint si Presidente Rodrigo Duterte tungod kuno sa daghan niyang kalapasan gikan pa sa mayor pa siya sa dakbayan sa Davao hangtud ning panahona nga daghang nahagba niining iyang gubat batok sa negosyo sa ilegal druga.

Si Magdalo partylist Representative Gary Alejano maoy mipasaka sa maong impeachment complaint didto sa Ubos Balay Balauranan. Nahibalo na kita nga ang Magdalo maoy grupo ni Senador Antonio Trillanes, ang usa sa mga maisogon nga kritiko ni Duterte.

Ambot kun mosaler ba kining maong impeachment complaint. Apan sa akong tan-aw, mora’g maglisod gayud kini nga moarangkada didto sa Ubos Balay Balauranan. Nasayod na kita nga mayoridad sa mga kongresista mga kaalyado sa presidente.

Panahon pa man sa pagkahimugso sa independensiya sa Pilipinas, naandan na sa dagan sa pulitika sa nasud nga wala g’yuy makatumba sa mayoridad, ilabina kun anaa kanila ang nagkupot sa renda sa pangagamhanan.

Nagpungasi nga mga impeachment complaint ang gihapak batok kang kanhi presidente Gloria Arroyo kaniadto. Apan wala ni usa ang milusot ngadto sa Senado. Kini tungod kay tulin pa sa alas kuwatro nga makababag ang iyang mga kaalyado didto sa Lower House.

Sa akong nakita, mao usab kini unya ang dangatan sa impeachment complaint nga gipasaka ni Alejano. Gani, walay kisaw ang maong complaint karon, gawas lamang mismo ni Alejano nga sige karong pagarpar sa media batok sa Presidente.

Bisan kadtong mga taga oposisyon sa Kongreso adunay dakong pagduda sa tsansa nga molusot ang maong impeachment complaint sa Ubos Balay Balauranan paingon ngadto sa Senado. Gani daghan kanila ang wala lamang manumbaling sa maong kaso.

Daan na kitang nasayod sa tinuoray nga labok ni Trillanes ug sa iyang grupo nga Magdalo. Sa wala pa man ang eleksiyon, daan na niyang gipunterya si Duterte. Kay lagi wala man magsilbi ang iyang mga atake kaniadto, iya gayung buhaton ang tanan nga ma-impeach ang presidente.