Kupas na tulain

Pagtula ko ngayon ay parang kupas na

Dahil sa mahabang panahong nawala

Hindi ko makamit ang dating ligaya

Na noong kabataan ay laging kasama.

Kahit pagbalikan ang batang kahapon

Ayaw nang magbalik sa diwa ko ngayon

Malakas na hangin na nagdaan noon

Naging mga bagyong sa bansa’y nagbaon.

Ang hangin at ulang hindi humihinto

Nagsilbing parusa sa diwa kong bigo

At kung ibabalik nagdaang baligho

Wala na sa diwa at lalong lumayo.

Hinahanap ngayon ang dating diwata

Na laging kapiling kapag kumakatha

Di na mahagilap liwanag ng diwa

At waring sumama sa pusong may luha

Magbalik pa kaya ang dating kahapon

Na ang puso’t diwa busog sa panahon

Ang ulan at bagyo na nagdaan ngayon

Panahong kaiba sa panahon noon.