Ibta kun mag-brownout

Kun nakabantay mo karong panahona, dili lang sa supply sa tubig ang nagnihit, kun dili, lakip na usab ang supply sa kuryente kay nakasinati man kita og pagtiurok sa supply sa kuryente.

Kalit ra ba kini nga mapalong ug dili ra pud nato mabantayan nga mobalik ra sab dayon. Kini maoy rason nga ang inyong kabomberohan nagpakatap og safety tips kabahin niini aron kita makahibawo sa hustong buhaton kun mag-brownout.

Kun makasinati kita og brownout, kinahanglan nga ibton ninyo ang tanang nakasaksak nga de-kuryenteng appliances ug palongon ang mga suga.

Mas labing maayo og i-off gyud ang plangka. Ang tumong niini aron sa pag-prevent og circuit overload kun mobalik na ang supply sa kuryente nga mao unya ang posibleng hinungdan sa sunog kun ang atong mga appliances pabiling naka-on bisan og walay kuryente o ba kaha wala kini ma unplug.

Angay’ng  batasanon nato ang pagsiguro nga atong ma-off ang tanang appliances panahon sa brownout aron hingpit kita nga luwas sa sunog.

Sa pikas bahin, kun sa inyong komunidad naghitak ang pagpangawat sa kuryente pinaagi sa jumper ug uban pa nga paagi nga makakuha og direktang supply sa kuryente sa poste o main line, ipahibalo dayon kini sa VECO aron maaksyonan.

Usa kini sa kasagarang hinungdan sa sunog ang ilegal nga koneksyon sa kuryente.

* * *

Sa kataposan, nahuman na gyud ang duha ka buwan nga training sa mga personnel sa Bureau of Fire Protection (BFP-7) nga mikuha sa Fire Protection Supervisory Course niadtong Hunyo 9, 2016.

Sa tanang nigradwar, congratulations sa FPSC 2016-01 Class    Tagamasid.