Metamorphosis

Samtang inihap na 0lang ang iyang mga adlaw sa pagka-mayor sa dakbayan sa Davao, matud ni President-elect Rodrigo Duterte nga iya una nga pahimuslan ang nahibilin niyang mga adlaw sa pagkabastos.

Iyang giangkon nga bastos siyang pagkatawo. Busa, samtang dili pa siya opisyal nga presidente sa Pilipinas, magsige una siya sa pagbinastos ug pamalikas.

Iyang gipakahisama ang iyang kaugalingon sa usa ka ulod nga mopaubos sa proseso sa metamorphosis. Ang metamorphosis mao ang hingpit nga pagkausab sa porma o kinaiya sa usa ka butang o tawo ngadto sa usa ka bag-ong hitsura o kinaiya.

Sama sa usa ka ulod, gikan sa pagka ulod, mahimo kining usa ka nindot nga alibangbang sa pagpaubos sa proseso sa metamorphosis. Kana ang gustong mahitabo ni Duterte sa iya na nga opisyal nga paglingkod sa katungdanan isip presidente sa nasud.

Apan sa pagkakaron, matud niya maghuwat una kita. Atong paaboton ang iyang kausaban, nga gikan sa pagka ulod, mobusikad unya ang usa ka nindot nga alibangbang.

Ang buot niyang ipasabot nga gikan sa iyang pagkahimalikas, dili na unya kita makadungog o iya na nga menos-menosan ang iyang pagpamalikas.

Pero ambot kun ang metamorphosis nga gustong mahitabo ni Duterte iya bang hingpit nga matuman. Sa metamorphosis hingpit nga kausaban ang mahitabo. Mawagtangan ka sa imong karaang identity.

Gikan sa imong pagkaulod, mahimo ka na nga usa ka hingpit nga alibangbang. Ang buot ipasabot, ikaw dili na mao ikaw. Hingpit ba nga mausab ngadto sa usa ka lahi nga Duterte ang molingkod unya nga presidente sa nasud?

Unsa may buot usbon sa hingpit o talikdan ni Duterte? Ang iyang pagkahimalikas, pagkabastos og sinultihan, pagkahambugero o pagkabugoy sa iyang paglingkod sa katungdanan?  Mura'g kuli na nga mahitabo.

Nakagamot na sa sistema ni Duterte ang iyang pagkahimalikas ug ang pagkabastos. Nagtubo siya nga ingon niana, busa, dili na mawala sa usa ra ka pagpamilok. Gipili siya sa kapin 16 milyones ka mga Filipino tungod sa iyang isog nga baruganan batok sa kurapsiyon, drugas ug ubang matang sa kriminalidad. Ang mga kidnaper, durugista ug ubang kriminal didto sa Davao City nga mabuhi dili gyud makalingkawas sa santako ug balikas ni Digong.

Karong tibuok Pilipinas na ang iyang dumalahon, mas gikinahanglan niya ang pagpamalikas. Mas dako ang problema ug mas bug-at ang mga hagit nga iyang atubangon sa pagdumala sa nasud.

Busa, angay siyang mamalikas. Isip tawo, natural ang pagpamalikas, apan ipahiluna sa tukmang lugar ug okasyon base sa husto nga pamatasan. Ang pagpamalikas usa ka matang sa pagpagawas sa stress. Timailhan usab kini sa matang sa kalig-on sa usa ka tawo.

Apan ang pagkahimalikas ug medyo bastos nga kinaiya ni Duterte, tipik ra sa kinatibuk-an niyang pagkatawo. Panghinaut lang nga dili kini gamitong instrumento pagpalusot sa mga bulilyasong desisyon.

Samtang mopaubos sa metamorphosis si Duterte, mas nindot usab nga kitang tanan, ma dumadapig man, kritiko o deadma lang, ug walang "paki" sa mga panghitabo makasinati usab unta sa metamorphosis ug  andam nga mopaubos niini.  Kini maoy labi natong gikinahanglan.