EDITORIAL - Kampanya batok krimen Aron

Aron paghingusog sa kampanya batok sa ilegal nga drugas ug krimen dinhi sa dakbayan, usa sa nahuna-hunaan ni mayor–elect Tomas Osmeña ang paggamit sa mga tanod ug barangay peace officers aron ikauban sa kapolisan.

Gani usa sa mga gustong mahitabo ni Osmeña nga armasan kining maong mga tanod ug hingusgan pa ang intelligence gathering pag-ila kinsa kadtong mga nalambigit sa ilegal nga mga kalihokan. Maayo kini tungod kay madugangan ang mga peace officers sa kabarangayan nga dili magpanuko og responde kun sila may backup kanunay nga mga polis. Apan dili lang unta kadtong mga badlungon sama sa mga palahubog, sugarol, kawatan, tsismosa, pataka’g labay og basura ug uban pang ginagmay nga salaod maoy ilang mapatarong kay kini madala na man daan sa pagbadlong ug pagpadakop sa mga tanod.

Ang angay nilang tutokan kining mga nagpuyo nga mga drug pushers ug mga drug lords sa ilang barangay. Kini sila maoy angay nga pakgangon hasta kadtong ilang mga protektor nga naa sa otoridad.

Ang paggamit sa kusog (armas) kataposan na untang opsyon, kay mas maayo pa gihapon kun motahan sila tungod sa kahadlok ug pagtahod sa balaod. Apan kinahanglan estriktuhon sa kapolisan ang pagpili kun si kinsa kadtong ilang tugotan nga mga tanod makabaton og armas.

Dili unta kalimtan ang mga leksyon kaniadto sa panahon sa Martial Law dihang ang mga tanod ug ang mga civilian volunteers nga giarmasan nagamit sa mga politiko isip pribado nilang goons.

 Kinahanglan nga moagi og makuting proseso ang pagpili kanila sama sa paagi paghatag og pagtugot sa mga polis, mga blue guards ug mga sibilyang nanag-iya og lisensyadong mga armas kun kinsay tugotang makadala og armas.

Sa laktod pagka-estorya kinahanglan nga responsable sila nga magdala niini ug dili gamiton ang ilang posisyon aron manghulga sa ubang tawo.