EDITORYAL - Nagtinga na ang BBL

Kwarentay-otso na lang ka oras ang nahibilin aron mapasar ang Bangsamoro Basic Law diha sa Ubos Balaybalauranan bisan pa man mayoriya sa mga sakop niini kaalyado ni Presidente Benigno Aquino III. Human niini, adto na usab kini dad-on sa Senado nga adunay kaugalingong bersyon.

Pipila ka mga magbabalaod, ilabi na ang napulo ka mga kongresistang Muslim ang nasagmuyo sa  dangatan sa BBL kay ang malungtarong kahapsay ug kalinaw sa Mindanao susama ra og napalid na usab sa hangin.

Kun mahinayon ang pagkabasura sa BBL, magmaya sa kalipay ang mga nisupak niini, apan mapuno na usab sa kahadlok ang mga taga Mindanao kay senyales kini sa posibleng laing hugna sa giyera.

Daghan na usab mga anak sa mga sundalo, polis, rebelde ug mga inosenteng mag-uuma ang mailo tungod niini. Daghang mga lugar nga nasugdan na og abot sa mga programa sa gobiyerno ang mapunta sa wala  tungod sa kagubot.

Husto si Lanao del Sur Pangalian Balindong, daw gihikawan ang taga Mindanao sa kalinaw ug paglambo. Daw idlas bisan na lang ang patas nga pagtan-aw sa minoriyang mga Muslim ug mga Lumad.

Dili ba ang Konstitusyon nigarantiya man og patas nga pagtagad sa tanang mga Pilipino? Hain na man ang kaangayan niini kun daugon lang sila sa mayoriya pinaagi sa ilang pagsige og absent sa sesyon aron matuki unta ang BBL?

Kadtong mga magbabalaod nga walay pagpakabana kay nagsige  lang og absent sa sesyon silay angay basolon kun mobalik na usab ang giyera sa Mindanao. Kining ingon ani nga kagubot ug pagkabahin-bahin maoy gipaabot sa mga ekstremista, radikal ug terorista aron makakuha og mga dumadapig.

Apan bisan pa man niini, kinahanglang maghimo nang daan ang gobiyerno og mga hapin sama sa mga proyekto, programa, proteksyon ug uban pang mga pamaagi aron dili mosangpot sa kagubot ang kamatayon sa BBL.