Pabiling karaan ang sistema

Pormal nga magsugod karong adlawa ang dako nga relihiyosong katiguman dinhi sa dakbayan sa Sugbo. Ang 51st International Eucharistic Congress maoy usa sa labing importante nga katiguman sa kalibotan sa simbahang Katoliko nga dinhi ipahigayon.

Sulod sa usa ka semana, ato na usab nga masinati ang kahuot sa dagan sa trapiko tungod sa mga pagsira sa pipila ka dalan sa dakbayan. Kini sugod karong adlawa hangtud na sa katapusang adlaw niining bulana.

Tungod niini, hugot na usab nga siguridad ang gipatuman sa otoridad sa Sugbo, ilabi na niadtong mga lugar diin ipahigayon ang mga kalihokan kabahin sa maong kongreso. Normal kini gumikan usab sa liboan ka bisita nga ania dinhi.

Ug manghinaut na usab kita nga wala’y dagkong insidente, ilabina kabahin sa mga krimen, ang mahitabo atol sa usa ka semana nga kalihokan. Kini aron dili mamantsahan ang imahe sa dakbayan sa Sugbo isip nag-unang lugar alang sa mga dagkong katiguman sa Kabisayaan ug Mindanao.

Gani bag-o lamang mi-host ang Sugbo sa pipila ka ministerial meetings sa Asia-Pacific Economic Cooperation Summit. Ug gidayeg sa mga APEC organizers ang Sugbo tungod sa dakong kalampusan sa maong mga katiguman.

Dili ikalimod nga garbo sa Sugbo ang maka-host og mga dagkong katiguman, ilabi na sa mga international conferences. Usa kini sa mga paagi pagpalig-on pa sa kampanya pagdani og mga turista sa Sugbo.

Sa ka hugot sa siguridad ug ka huot sa mga nag-unang dalan sa dakbayan karon, hangyo sa otoridad ang taas nga pasensiya gikan sa katawhan. Hinuon dili usab nato malikayan nga adunay pipila ang maburyong ug magsige na og reklamo sa sitwasyon karon.

Apan hinaut nga dili na lamang usab rerouting ang naandang buhaton sa otoridad. Kinahanglan gayud nga mangita sila og paagi nga ma-modernized na ang sistema sa transportasyon dili lamang sa Metro Cebu kondili sa tibuok probinsiya. Salikwaot hunahunaon nga bisan sa ka progresibo sa Metro Cebu karon, pabiling karaan ang sistema sa transportasyon niini. Ug klaro nga resulta kini sa wala’y maayong panglantaw sa atong mga opisyales kaniadto.

Karon kita nga henerasyon mao na hinuon ang nag-antos.