Tagsa ka libo kada balikas

Sa elementary pa ko, giingnan mi sa among maestra nga kinahanglan magkat-on mi sa pagsulti og iningles. Aron mahanas mi pagsulti og iningles, kinahanglan nga mobayad mi og tag 25 sentimos matag sulti namo og binisaya kun makig-estorya sa among classmates. Ang 25 sentimos kaniadto dako na kaayo.

Sa sinugdanan maningkamot gyud mi nga dili makasulti og binisaya aron dili mi makabayad. Kiwaw kaayo paminawon ug bation nga mag-iningles mi tungod kay una sa tanan dili ni maoy among naandan nga pinulongan.

Lumad mi nga mga bisaya. Sa among pagpauli sa tagsa-tagsa namo ka pinuy-anan, dili mi makaestorya og iningles sa among kabanay. Sa laktod, wala mosalir ang gipatuman nga lagda sa among maestra.

Maayo ra kadto sulod lang sa pipila ka adlaw. Sa kadugayan nibalik mi sa naandan nga magbinisaya sulod sa klase. Ambot kun ingon pa ba kaha gihapon ang sitwasyon karon diha sa mga classroom.

Kini maoy akong gihimong sanglitanan nunot sa saad ni Davao City Mayor Rodrigo Duterte nga magmabinantayon na siya sa iyang mga sinultian, ilabi na sa iyang mga pamalikas.

Human siya makadawat og daghang pagsaway tungod sa iyang pagbalikas ni Pope Francis nga maoy nakaingon sa grabeng traffic didto sa kaulohan sa iyang pagbisita sa nasud niadtong Enero, nisaad si Mayor Duterte nga mag-“meter-meter” na sa iyang pamalikas.

Gani, nisaad siya nga mohatag og P1,000 ngadto sa Caritas Davao Foundation matag higayon nga siya makapamalikas. Tuod man, sa niaging adlaw nakahatag siya og P2,000 ngadto sa foundation tungod kay nakapamalikas siya makaduha ka higayon atubangan sa mga pari dihang nakigtagbo siya ni Davao City Archbishop Romulo Valles.

Apan unsa ba ka matinud-anon si Mayor Duterte sa iyang saad?  Kinahanglan ba nga bugtian og kantidad ang matag pamalikas nga iyang luwatan aron siya makaamgo?

Dili ba usa man gihapon kini ka matang sa panuborno? Alang sa uban ilabi na sa mga dumadapig ni Mayor Duterte, ang iyang pagpamalikas gamay ra kaayo nga sayop itandi sa minilyon ka pesos nga gipangawat sa mga kurakot nga nakapwesto na sa gobiyerno.

Wala ra kini sa kumingking sa mga pangabuso, drug trafficking, smuggling, pagpanulis, pagpamatay, pagpanglugos ug daghan pa nga kalapasan. Kini pa gani nga mga binuhatan ang angay nga balikason ug panghimaraoton.

Nakahinumdom lang ko sa usa ka panultihon sa iningles nga nagkanayon. Watch your thoughts. They become words. Watch your words. They become deeds. Watch your deeds. They become habits. Watch your habits. They become character.