Si Wayne ug Agnelen
Unang nabantayan ni Wilfredo Paspi, security guard sa Alcon Building sa Almendras St. sa Mabolo, Cebu City, ang berde nga Kia Picanto sa alas-7 sa gabii niadtong Miyerkules. Iya lang gipasagdan sa nisunod nga 11 ka oras. Pagka alas-6 sa buntag sa Huwebes, nahibung na siyang nagpabilin pang sakyanan, nga way nisud ug way nigawas.
Kay tinted man ang bildo, iyang gipadul-an ug gilili sa pamasin nga makit-an ang sud sa sakyanan. Labihan niyang kuganga pagkakita nga may tawo nga nagtikubo, ginapos og masking tape ang mga tiil ug gitabonan og panapton ang nawong. Tungod sa kaputi ug kagamay sa mga tiil, nangagpas siya nga babaye ang biktima.
* * *
Nag-jogging duol sa mga tindahan og siomai sa Tisa, Cebu City si Dr. Gregg Victor Gabison, Dean sa College of Information, Computer and Communications Technology (CICCT) sa University of San Jose-Recoletos (USJ-R), dihang iyang nadunggan ang report ni RC Dalaguit sa DYAB Abante Pa, Bisaya! nga iyang kanhi sakyanan ang nahimutangan sa patay’ng lawas.
Nanawag dayon sa DYAB si Gabison aron pagpahibawo nga nabaligya na niya ang sakyanan ngadto sa iyang kasosyo sa negosyo sa una nga si Wayne Uy. Ang ngan sa kompaniya sa ID nga nakit-an duol sa patay’ng lawas giilang Gabison nga gipanag-iya ni Uy. Ang sunod nga kasayuran ni Gabison dako og natabang sa mga imbestigador.
* * *
Nakadawat si Gabison og duha ka sunudsunod nga text messages gikan ni Uy sa alas-12:19 ug alas-12:20 sa kadlawon sa Huwebes nga iyang nabasahan pagmata niya sa alas-5 sa buntag. Managsama ang mensahe: Gi-carnap ang Picanto, giapil pagkidnap ang iyang asawa ug si Gabison ang unang tawgon sa kapolisan kay wa pa mabalhin ang mga dokumento sa pagpanag-iya sa ngan ni Uy.
Samtang naminaw silang Gabison sa DYAB, nagpada ang kapolisan og mga sakop pagpangita sa bana sa Bacayan, Talamban dihang way nitubag sa contact number ni Wayne Christopher Uy nga nahimutang sa nakit-ang ID ni Agnelen E. Uy.
* **
Mas unang nakahinabi ni Wayne si June Perez, News Director sa DYAB. Nagdumili si Wayne pagtubag sa iyang mga pangutana apan nipasalig nga moduaw siya sa DYAB uban sa iyang abogado aron pagpanubag sa tanang pangutana. Human sa ilang panagsulti, may nanawag sa Cebu Rolling Hills sa A.S. Fortuna, Mandaue City. Nga natubag sa manager nga si Fernando Bertulfo dungan sa pag-abot sa patay’ng lawas sa babaye. Nagpaila ang nanawag nga siyay bana ug nipasalig nga moadto aron ilhon ang patay’ng lawas.
Niabot sa punerarya si Wayne, luspad, klarong way tug. Wa manubag og pangutana. Apan niboluntaryo sa kasayuran nga may karelasyong laing lalaki ang iyang asawa. Wa hinuon katarung pagpasabot nganong may pinaakan sa iyang baba.
- Latest
