Problema sa Iglesia

Gipaundang na lang sa labaw sa Iglesia ni Cristo ang rally sa mga sakop niini, napabiling kuwestiyon sa katawhan ang tinuoray nga intensiyon sa maong organisasyon paglusad niadtong pipila ka adlaw nga protesta sa EDSA.

Sa mga placards nga gibitbit sa mga sakop sa INC nakasulat ang pagsaway kang Justice Secretary Leila de Lima, pag-awhag sa DOJ paghunog sa "pagpanghilabot" niini sa kalihukan sa ilang organisasyon, ug pagsinggit og "separation of church and state."

Kun wala pa sugoa sa mga lider sa Iglesia ang ilang mga sakop pagprotesta sa imbestigasyon kalabot sa giingong "kidnapping" ug uban pa'ng krimen sa mga ministro ug mga opisyal sa organisasyon, wala masayri sa katawhan ang tinuoray'ng kolor.

Ang mga raliyistang sakop sa Iglesia sa interbiyu sa mga TV reporters, igo ra gyung moingon "pinadala lang kami dito, wala kaming alam."

Nagbaha ang pagsaway sa social media sa giingong "double standard" sa Iglesia. Nagsinggit sila og "separation of church and state" sumala sa gimbut-an sa 1987 nga Konstitusyon, apan kadaghanan sa mga Pilipino nanaway sa pag-endorso og mga kandidato sa mga nasyonal nga eleksiyon. Nahibaw-an usab nga daghang mga appointee sa mga posisyon sa Bureau of Customs giduso sa Iglesia.

Dali usab kaayong nakasabot ang mga tawo sa isyung gihapak sa Iglesia kang De Lima. Si De Lima igo ra nga nagtuman sa iyang trabaho pagsusi sa kun tinuod ba nga adunay mga ministro ug mga opisyal, apil na ang inahan ug anak sa kinatas-ang ministro sa Iglesia nga gipangkidnap ug gipangdetener.

Alang kanako, bisan usa ka "simbahan" kining Iglesia, apan dili kini "exempted" sa pagtuman sa balaod sa Pilipinas. Kay aduna may nabalita nga krimen sulod sa ilang organisasyon, angay kining imbestigahon, ug ang DOJ maoy gitahasan sa balaod pagsusi niini. Nagkahigayon lang nga si De Lima ang kalihim sa DOJ.

Kun nakadistorbo na sa kalinaw sa palibot ang mga panghitabo bisan sulod sa tag-as nga paril sa usa ka organisasyon, angay gyud kining susihon sa gobiyerno. Ug nganong dili man gustong motuman sa balaod ang mga lider sa Iglesia?

Duha ka mga politiko dali usab kaayong misakay sa isyu sa Iglesia. Apan giulan og mga pagsaway silang Bise Presidente Jejomar Binay ug Senador Grace Poe kay matud nila nganong hilabtan man ang kalihukan sa Iglesia nga kalihukang relihiyon man kini.

Maayo gyung duklon si Binay ug si Grace. Gibugoan na lang gyud sila sa mga Pilipino. Kana diay'ng kidnapping ug illegal detention kalihukang relihiyon diay na, Binay ug Grace?

Punterya nilang Binay ug Grace si De Lima nga usa sa gikonsiderar sa senatorial ticket sa Liberal Party. Sa binugo nilang baruganan sa isyu sa Iglesia, nasawayan na hinuon sila sa mga tawo.