Maayo ba ang babaye nga presidente?

Daghan ang ganahan nga padaganon ang usa ka babaye pagka presidente sa Pilipinas sa eleksyon sunod tuig. Maayo kaha?

Sa kondisyon sa Pilipinas karon, diin mihugpa ang nagkalainlaing matang sa mga mananap, may igo kaha siya nga kusog ug kaisog sama sa usa ka bayani, kinsa andam motahan sa iyang kinabuhi alang sa kaluwasan sa tanan?

Pananglitan, babaye maoy mahimo nga pangulo sa nasud, unsa kaha ang bation niya, no, kun makatagbo siya’g mga higante nga sindikato nga dili mahadlok mopatay ug magpakamatay?

Dili kaha siya mokurog? Di kaha siya matarantar ug sa hilom, modawat na lang sa minilyong ka pesos nga offer bugti sa ilang ilegal nga negosyo?

Kun sa atong tagsa-tagsa ka panimalay, ang amahan maoy giisip nga haligi, unsa na kaha sa atong nasud nga maoy modala sa milyon-milyon nga pamilya? Timan-i, nga ang kasingkasing sa babaye, humok, dali ra nga maluoy ug dali pud makuyawan. May husto kaha siya nga kaisog nga makig-away batok sa mga daotan?

Hinuon, nakaagi na ta’g mga babaye nga presidente, sama nila ni anhing Cory Aquino ug Gloria Macapagal Arroyo.

Atong nasinati unsa ang ilang dinad-an ug giunsa nila pagdumala ang salapi sa katawhan. Si Cory namatay nga wa g’yud masulbad ang corruption, samtang si Gloria, napriso tungod sa graft and corruption charges nga gipahamtang niya.

Dinhi, angay nato nga estudyohan pag-ayo kun maayo pa ba nga usa ka babaye ang himoon nato nga presidente sa Pilipinas?