Ampon

Marami sa ating kababayan ngayon

Sila’y nabubuhay dahil sa inampon;

Di kayang buhayin nang sila ay sanggol

Sa bahay ampunan sila’y nangaroon!

Maging itong ating bansang minamahal

Ay inampon lamang ng bansang marangal;

Nang tayo’y sakupin nitong mga sakang

Kumilos ang U.S. pinalaya naman!

Tayo’y inalipin sa lakas ng puwersa

Tayo ay inampon nitong Amerika;

Kung hindi kumilos bansang nagpalaya

Tayo ay alipin sa hirap at dusa!

May mga dalaga na hindi matanggap

Na sila’y nabuntis nang wala sa oras;

Upang maitago ang kanilang malas

Kung saan-saan sila nanganganak!

At maging sa aking pagsulat sa dyaryo

Ako ay ampon lang ng editor nito;

Kung sa unang subok nabigo na ako

Wala kayong mababasa sa pitak na ito!

At may mga ampon na maswerte naman

Kahit sa abroad pa sila’y pinag-aral;

Pag-uwi sa bansa kanyang natutunan

Ibinahagi n’ya sa maraming bayan!

Katulad na lamang ni Senator Grace Poe

Si F.P.J. sabi’y ama nito;

Nagpakitang gilas doon sa senado

Palibhasa’y ampon ng mabuting tao!

Di siya baguhan sa kanyang mithiin

Siya ay nag-aral ng higit sa atin;

Kanyang karunungan higit na magaling

Siya ay hinog na at hindi balimbing!