Kawatan sa sakyanan hi-tech na

Ubay-ubay na nga mga tag-iya’g bag-ong sakyanan ang nakawatan og mga mahalong butang nga ibilin sulod sa ilang sakyanan tungod ning bag-ong modus operandi sa mga kawatan.

Matud pa, ang mga kawatan may moderno na nga kahimanan nga puwede’ng makaabli sa bisan unsang klase sa sakyanan nga gusto nila nga ablihan aron pangawatan kutob sa butang nga anaa sa sulod nga ilang maibgan.

Makawat ra ba nila ang maong butang nga ingon sa wala ra’y nahitabo. Sanglit gamit ang master key, pareho ra nga sila maoy tag-iya sa sakyanan nga sayon ra nila maabli ug maserado ang pultahan niini human kawati.

Usa nako ka higala nga si Jeora Catindig miingon nga diha kuno sa mga malls, adunay mga Duplicate Key Service Centers nga sayon ra kaayo makabuhat og duplicate key dili lang sa mga ordinaryo nga yawe, kun dili, lakip na usab sa mga latest model car remote keys nga barato ra.

Iya kini nga nahibaw-an diha nga ang yawe sa bag-o nilang sakyanan naguba kay nahumol sa tubig niadtong nangaligo sila kuyog ang iyang bata pa nga anak.

Kun ang mao nga naguba’ng yawe adto paduplikitan sa kasa o sa kompaniya, diin didto nila palita ang sakyanan, mahal ang presyo.

Apan sa Duplicate Key Center barato ra. Halos katunga ang deperensiya. Nakurat si Jeora kay sayon ra kaayo nga naduplikitan sa Duplicate Key Center ang iyang yawe, ug mao na kini ang iyang gigamit karon.

Pastilan, no? nagpasabot ba kini nga dili na diay safety ang mga lock nga gigamit sa mga sakyanan karon?

Sa kadagkoan sa mga kompaniya’g mga sakyanan, maayo ning susihon da, aron mabuhatan dayon og paagi unsaon pag-counter ning mga kahimanan sa mga kawatan nga nagkaanam pud ka hi-tech.