Unsaon pag-usab sa pangan sa birth certificate

Dear Atty. Divine,

Duna ko’y pangutana labot sa panga’n nako sa akong birth certificate. Sa akong Certificate of Live Birth ang akong first name Junrey ug mao kini ang akong gigamit lakip na sa akong pag-eskwela. Karong bag-o, mikuha ko og birth certificate sa NSO ug nakurat na lang ko kay ang akong first name “Johnny” man ug di man pareho sa first name nako sa akong Certificate of Live Birth. Busa naglibog ko karon kun unsay akong buhaton? Kun ipausab nako ang akong first name sa NSO, unsa may akong buhaton? Moagi pa ba ko sa korte? Daghang salamat. — Junrey

Dear Junrey,

Kun ipausab nimo ang first name sa imong birth certificate mamahimo ra kini nga adto nimo i-file sa Local Civil Registrar ug di na ka moagi pa sa korte. Ang una nimo nga buhaton mao ang pagpangayo og listahan ngadto sa Local Civil Registrar sa mga dokumento nga angayan nimo nga isumiter kanila alang sa pag-usab sa imong first name kay mangayo man na sila og NBI clearance, Police Clearance, Court Clearance ug uban pa nga dokumento ug nagkinahanglan ‘sab kana og publication sa imong petition sa newspaper. Kun makompleto na nimo ang mga requirements imo lang kini nga i-submit sa Local Civil Registrar uban sa imong Petition for Change of Name aron ila kining ma-process. Thanks and God bless. – Atty. Divine

Alang sa inyong pangutana may kalabutan sa problema’ng legal, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column mata’g Miyerkules ug Domingo.