Semana Santa

Abril 1-4 ay Mahal na Araw

Mga katoliko ay dapat magbanal;

Obligasyon nila magbawas kasalanan

Gumawa ng mga ukol sa simbahan!

Panahon din itong dapat magsisi

Mga kandidatong ang budhi’y marumi,

Gusto ay makuha boto nang marami

Gayong mga puhuna’y kislap ng salapi!

Ang mga pamilyang away na nang away

Dapat nang ayusin ang kanilang buhay,

Mga ama’t ina na nagkahiwalay

Dapat nang buuin nasirang patnubay!

Dapat ding magsisi sa panahong ito

Mga mamamayang maitim ang buto,

Sa mga tahanan ay santo-santito

Subalit sa labas ay markang demonyo!

Bigyan ng biyaya kung ito ang kaya

O kaya’y pagtulong na pang-kaluluwa,

Tayo nga’y magdasal at saka umasa

Darating sa atin ang bagong umaga!

Tayo ay magtika tayo ay magdasal

Semanta santa na o mahal na araw,

Isang linggo itong dapat na magbanal

Ang lahat ng taong lalang ng Maykapal!

Tayo ay lumuhod sa harap ng diyos

Na taglay sa puso pag-ibig na taos,

Sa panahong ito tayo ay kumilos

Na ang mga dukha’y yakapin nang lubos!