Mga benepisyo sa Neem tree (1)

Sumala sa pagtuon sa atong mga eksperto, ilang nadiskubrehan nga ang ‘Neem tree’ adunay daghang benepisyo, kabahin sa atong panglawas sama sa mga mosunod, nga atong gihan-ay lakip na ang pagpreparar niini.

*KASPA (Dandruff) – ‘Anti-fungal/anti-bacterial’ kini, nga kun nangatol ang ulo tungod sa kaspa….magpabukal og 4 ka tasang tubig, ilunod ang 1 ka hakop sa mga dahon niini, hangtud moluspad kini o mo-green na ang tubig. Pabugnawa, unya human mag-shampoo ug banlaw sa tubig, himoa nga ang katapusang ibanlaw ang tubig sa linaga sa dahon nga neem.

*PROBLEMA SA PANIT – ‘Anti-viral/antiseptic/anti-bacterial’ ni, aron mamintin ang kahamis o lumoy ang panit, ug ingon man pag-ayo sa mga problema sa panit sama sa acne, eczema, psoriasis, rashes ug uban pa. Pagdukdok o lusonga ang mga dahon hangtud molaput o mopasta, dayon ihaklap sa apektadong panit. Paugha ug banlawan og bugnaw nga tubig.

Buhata ni kausa sa adlaw o hangtud makontento na.

*MGA KUTO o LUSA – Ang ulo nga nangatol/nairetar tungod sa lusa o kuto, mangamatay sa ‘neemseed extract’ sumala sa 2012 ‘parasitology research’, kausa ra moepekto na. Pagdukdok o lusonga ang mga liso sa neem hangtud molapot o mopasta. Unya ipahid/ihiso sa buhok ug bagulbagol nga paughon. Dayon banlawan sa init nga tubig. Sudlaya gamit ang sud o ang pinong sudlay para sa kuto. Buhata kini kaduha sa semana sud sa 2 ka bulan.

*PAGMINTIN SA BABA -  Magsipilyo, maglimugmog, gamit ang duga sa linusak sa mga dahon, nga mopatay sa mga bakterya sa sakit sa ngipon ug lagos. Pataudtaura, dayon maglimugmog og tubig ininit. Buhata ni kausa sa adlaw.