Kakulang sa tubig ug kuryente

Niining unang ang-ang sa ting-init, daghan na usab ang magproblema sa ka kulang sa tubig ug kuryente sa mga urban areas sa nasud sama sa Metro Cebu. Gani dinhi sa Sugbo, aduna nay nasinating power ug water interruptions sa ubang mga lugar.

Basta summer na gani, kalbaryo gayud namo nga nagpuyo sa taas nga lugar sa dakbayan sa Sugbo ang kanihit sa tubig. Makasapot gayud tungod kay adunay mga adlaw nga mag-uga ang mga gripo sa among lugar ibabaw nga bahin sa Capitol Site ning dakbayan.

Dihay mga higayon nga magpadala og mga water tanker ang Metro Cebu Water District sa among lugar. Apan hilabihan ka kulang sa rasyon. Daghan ang magbagolbol tungod kay nabitin sa libre nga tubig.

Gani adunay mga higayon usab nga mineral water na lamang tawon ang ikaligo sa pipila ka residente sa amo nga lugar. Kini gumikan lagi sa dako nga kakulang sa suplay sa tubig panahon sa ting-init.

Sukad pa kaniadto, maglisod gayud og saka ang tubig sa taas nga bahin sa dakbayan sa Sugbo matag ting-init. Mao nang mohubas usahay ang gripo sa mga panimalay. Kun aduna man gani tubig, hinay lamang kini moagas.

Hinaut nga nasulbad na kining maong seryoso nga problema sa MCWD. Hinaut nga abunda na sa suplay sa tubig ang maong kompanya nga molahutay bisan didto sa bukirang lugar ning dakbayan matag ting-nit.

Hinuon daan nang misaad ang tagdumala sa MCWD nga adunay igo kini nga suplay sa tubig karong summer.

Gani sa nangaging mga bulan, nakakuha kini og dugang suplay sa tubig alang sa nagkadakong konsumidor niini sa Metro Cebu.

Kabahin sa kuryente, magnihit usab ang suplay niini dinhi sa Sugbo matag ting-init. Kini tungod usab sa nagkadako nga konsumo sa kuryente sa mga panimalay ug establisemento, ilabina sa Metro Cebu, matag summer.

Ug sama sa naandan, morag kulangon na usab ang atong suplay sa kuryente niining panahona. Kini ilabina nga dunay mga taho gikan sa kaulohan mahitungod sa dakong kakulang sa suplay sa kuryente sa tibuok nasud.

Angay lamang nga hatagan og prayoridad sa otoridad ang dakong problema sa suplay sa tubig ug kuryente dinhi sa Sugbo. Kay kun magpasulabi kini, dili unya tiaw ang kadako sa maalkanse sa atong lokal nga ekonomiya.