Ang Adik

Mao kini ang binisaya sa  inenglis nga ‘addict’. Ang buot ipasabot ani –“Subra ang debosyon sa usa ka buhat o butang … sama anang tawo nga magluya kun way trabahoon - moduko la’g paawot nga di kabalibad - hidlawon o uhaw perming di mahimutang nga mag-alindasay - magluya kun di kainom o kasuyop og tambal o nahimong bisyo nga permi niyang pangitaon”.

Maayo unta ang naadik sa trabaho apan nanubra ra ang kakugi, kay sagad nila, di na magtagad sa pagkaon ang resulta kulang pa ang suweldo igasto sa sakit. Ang adik pud anang sigi’g basa mawad-an po’g gana sa pagkaon kayang hunahuna tua na sa kahinam sa gibasa, masuko pa istorbuhon bisa’g wa nay nahimong buhat nga morag labaw pa sa galakwatsa, nga nag-usik lag oras. Sa ato pa, kun maadik ang tawo sa iyang bisyo, mawala ang iyang control sa kaugalingon, mora siya’g naulipon sa iyang gihimo, nga mora’g robot lang nga mosunod sa diktar sa buhat ug dili na ang kabubut-on sa utok o paminsar. Dinhi magsugod nga mawala ang balance sa pag-atiman sa kahimsog sa lawas.

Makalapas na sa balaod sa kahimsog nga kun di kita mamalandong sa mga epekto sa atong binuhatan. Muabot ang panahon nga mabilanggo na kita sa hilabihang kapait sa kinabuhi. Busa ayaw tugoti nga maimpluwensyahan kita sa kapildehan kun dili maoy lantawon ang kabulahanan sa atong kinabuhi.

Og kadtong naadik sa druga, matud pa doble ang pilde nato. Apan ayaw pagpakawala sa paglaum kay may higayon pa nga makabawi kita. Segun pa sa mga eksperto sayon ra ang himoon. Ipusta ang kaugalingon sa tiunay nga kausaban ngadto sa pamalandong, aron makaseguro sa buhatong pagbag-o.