EDITORYAL - Mga ligoy dili hatagan
Ang kagamhanan sa dakbayan sa Sugbo mihatag og dugang honorarium ngadto sa tanang opisyal sa kabarangayan matag buwan aron motabang sila pagpatuman sa mga gimbuhaton sa City Hall diha sa masi’g nila ka barangay.
Apan subo kaayo palandungon nga kadaghanan sa mga opisyal sama sa kapitan, konsehal, treasurer ug secretary sa barangay, wala g’yud mohimo’g abag sa City Hall ug nagkangkang lang ang ilang kamot nga midawat sa additional honorarium.
Ang mga kapitan modawat og ‘tag P5 mil kada buwan, P3 mil usab matag buwan sa konsehal ug ‘tag P2 mil usab sa mga barangay treasurer ug secretary. Adunay sugyot nga kadto’ng mga ligoy nga opisyal sa barangay dili na pahatagan og additional honorarium gikan sa City Hall.
Si Cebu City Councilor Philipp Zafra, presidente sa Association of Barangay Councils (ABC), uyon sa sugyot ni Kapitan Lediore “Boy” Miranda (San Roque) nga dili hatagan ang mga ligoy nga opisyal sa barangay.
Tukma lang nga uyonan ni Mayor Michael Rama ang sugyot unya sa ABC kana kun dili siya mamolitika nga bisan ang mga ligoy pahatagan niya’g dugang honorarium gikan sa City Hall kay mahadlok nga maminosan ang iyang suporta sa eleksiyon sa 2016.
- Latest
