Mosamot sa pagtidlum

Nindot ang joint project sa Visayan Electric Company (VECO) ug sa Department of Energy (DOE) nga gitumong aron mapasug-an g’yud ang mga dapit nga sa dugay’ng panahon nag-antos sa kangiob.

Matud ni Eric G. Ching, ang manager sa Reputation Management Department sa VECO, nga daghang mga dapit sa unom ka barangay sa kabukiran sa dakbayan sa Sugbo, mapasug-an na sa dili pa ang Pasko.

Ang DOE adunay pundo’ng-salapi ug ang VECO maoy misugyot kun asa nga dapit ang pangtukoran nila og mga poste aron ang kuryente makaabot sa mga hilit nga lugar sa kabukiran.

Sa ato pa, hayag kaayo ang Pasko sa katawhan nga nagpuyo niini’ng mga lugara. Salamat kaayo sa mga higala nato sa VECO sama nila’ng Ma’am Riza Coloyan ug sa ilang department head nga si Ma. Theresa Sederiosa.

Sila maoy moaksyon dayon kun adunay mga problema nga maglambigit sa VECO.

* * *

Daghang mga pagduda nga si DILG Secretary Mar Roxas mao g’yud ang ituboy ni Presidente Aquino nga kandidato sa Partido Liberal nga maoy moatbang kang Vice President Jejomar Binay.

Taud-taud na ko nga naniid sa mga lihok ni Roxas ug hangtod karon wala g’yud ko makabantay nga mihimo siya og lakang nga namolitika. Gani wala ko makadungog nga nagpa-interview siya sa media kabahin sa politika.

Nasabot nako nga trabaho ra gayud ang iyang gihuna-huna pagka karon aron pagtabang sa administrasyon ni PNoy. Wala gani niya usiki ang iyang oras pagtubag sa pasangil nga siya maoy nagsugo aron pasanginlan si Binay nga nakahimo og kurapsyon.

Diha ko nga aspeto nga midayeg ni Roxas. Maayo unta og hangtud sunod tuig, dili siya mausab. Layo pa man gud kaayo ang eleksyon sa 2016 ug dili angay nga mag-una-una sa pagpamolitika.

Sama’ng Binay, nagtabok-tabok na sa lainlaing lugar sa nasud unya makigdungan kunohay og kaon sa iyang mga dumadapig nga magkinamot. Pastilan, pagka klaro nga propaganda.

Tan-aw nako, kun tinuod man nga si Roxas maoy ituboy ni PNoy nga mopuli kaniya sa katungdanan, mosamot pagtidlum ang popularity rating ni Binay.

Tukma ang pag-analisar sa usa ka beterano nga magsisibya sa radio sa Sugbo nga ang mahitabo ni Binay mahisama unya ni kanhi senador Manny Villar kaniadto nga puwerte’ng sikata sa layo pa ang eleksyon.

Apan diha nga nagkaduol na ang eleksyon, mikalit lang nga wala na ganahi ang katawhan kaniya. Karon, bisan og mitibugsok ang popularity rating ni Binay, siya gihapon ang nag-una kay wala pa man siya’y lig-ong kontra.