Mikakak si Binay

Tan-awa, hadlok lagi g’yud si Vice President Jejomar Binay nga makigdebate kang Senador Antonio Trillanes kay nabalaka nga basin og mosamot pa kadaghan ang iyang kontrobersiya.

Daghang mga tawo ang nakapanglingo-lingo kagahapon diha nga gibalita ang pagbalibad na sa kampo ni Binay sa hagit ni Senador Trillanes nga magdebate sila’ng duha.

Unsa may gikahadlokan ni Binay nga abogado man siya samtang dili abogado si Trillanes? Matud ni kanhi kongresista Tomas R. Osmeña nga klaro kaayo nga may gikahadlokan si Binay.

Matud ni Binay nga direkta ra niya nga ipahibawo sa katawhan ang iyang mga tubag kabahin sa mga pamasangil batok kaniya, apan kun mosuroy sa lainlaing dapit dili halos magpa-interview ug dili usab mohatag og mensahe ngadto sa publiko.

Husto kaayo si Tommy nga ang pagbalibad ni Binay sa debate makapasamot ra sa pagduda sa katawhan nga tinuod ang tanang pasangil sa bise presidente.

Tiaw mo, bisan ang kadagkoan sa kaparian nga gipakigtagboan ni Binay nagduha-duha sa pagtuo sa iyang mga pagpanghimakak. Daghan g’yud ang nagtuo nga nakakuwarta g’yud si Binay sa mga proyekto sa Makati nga gi-overprice.

Sa giingon ko na sa makadaghan nga higayon, mas nindot g’yud nga si Binay moatubang sa imbestigasyon sa senado, o kaha public debate. Apan unsaon nga hadlok man si Binay.

Apan si Binay miingon nga usa siya ka “debater” ug abogado ug klaro nga malupig niya sa debate ang senador ug mahadlok siya nga isipon unya sa mga tawo nga gidaug-daug niya si Trillanes. Ha! Ha! Ha!

Kana kay nanghagit og debate si Senador Trillanes nga nasayod na’ng daan nga abogado si Binay nagpasabot nga dako kini og pagsalig sa kaugalingon.

Ako pa nimo VP Binay, isalikway na nimo ang kahadlok sa pag-atubang sa senado ug bakwia ang imong hukom, dawata ang hagit nga debate ni Trillanes.

Basin og tungod niini, makumbinsir pa nimo ang mga tawo nga anam-anam na nga nawad-an og gana sa pagsuporta kanimo sa umaabot nga eleksyon sa 2016.

Bug-at man gud kaayo ang pamasangil. Tiaw mo, overpriced ang Makati City Parking Building nga gisugdan pagtukod diha’ng mayor pa si Binay sa Makati.

Unya, mitumaw na usab ang report nga overprice gihapon og P824 milyones ang pagpatukod sa Makati City Science School building. Dayon may lapad nga hacienda si Binay didto sa Rosario, Batangas.

Tungod niini, ang katawhan magtuo nga ang iyang katigayonan nakuha sa pangurakut mao nga angay g’yud nga pamatud-an ni Binay nga dili kini tinuod pinaagi sa pag-atubang sa imbestigasyon o kaha debate.