Kaikag sa pagsulay

Kaniadto sa wa pa matukod kanang nagbuyon nga mga edipisyo o bilding sama sa  SM, Sun Gold, White Gold diha sa North Reclamation Area, usa kami sa may payag-pahuwayanan nianang dapita. Aduna mi daghang luna sa kahumayan, tangkongan, bungahoy ug pangisda-ang halwan ug tilapia.

Daghang nanukod dihang lugara nga gihimo na nilang pinuy-anan. Ngil-ad kaayong tan-awon ang wanang sa palibot nga nagpasad sa mga basura. Nagpanlingo nga gianugnan sa maong sitwasyon ang akong amahan, human niya kini gilibot sa iyang panan-aw. Namugna ang kaikag niya sa pagsulay.

Aron himoon kadtong kahiamgo, sa pagsulay nga matikad ang dakung posibilidad nga may dakung kapuslanan. Maikagon ug pursigidong mosulay sa kahigayonan,nga maugmad kini nga kahataga’g maayong kapanig-ingnan. Og kahamugaway nga makapadasig sa uban sa pagnunot o pagsunod sa maong kalamboan. Nga kahiusa sa panginlabot alang sa kabulahanan sa kinabuhi.

Daghan ang nahingangha dihang abunda kining gipaambitang bunga sa pagsulay, nga nakapalipay nila human matagamtaman ang wala damha nga kahimoan.  Nahigmata sila, nga basta mosulay, wala diay imposible kun kanunay kita magbaton og kahinam o kaikag nga buhaton, dili lang kutob sa pagsulay kundi hinurot ang pagsalig o paglaum, nga kita makapahimulos ini.

Daghan pa ang wala makahimo niini, kay maoy mipasulabi sa hunahuna ang kahadlok basin mapakyas, matamay pa ang garbo nga maoy nakaingon nga wala makalahutay. Kay nawad-a’g kusog sa mga pagsulay, nga unta sayon ra ang pagtikang sa unahan, diin anaa na ang katumanan sa mga pangandoy.