PDEA nagkyugpos gihapon
Dili na g’yud basta-basta ang mga bigtime drug pushers karon kay sangkap na sila sa tag-as nga kalibre sa mga armas.
Mosukol na sila sa mga polis nga moronda sa ilang tagoanan kay nakahupot na man sila og mga “high-powered” nga armas sama sa nakuha sa mga drug pushers didto sa lungsod sa Ubay, Bohol niadto’ng Biyernes sa kaadlawon.
Pahalipayan nako si Superintendent Rex Derilo ug kaubanan nga maoy mironda sa tagoanan sa drug pusher nga si Romulo Caño, ang kauban niadtong polis nga si Owen Rosales nga napatay ‘sab sa pinusilay batok sa mga tinugyanan sa balaod.
Nakadungog ko nga dinhi sa dakbayan sa Sugbo sangkap usab sa armas ang mga drug lord ug iampo nato nga sa umaabot nga mga adlaw rondahon sila sa mga polis. Giprotehean sa kapitan kini’ng mao nga drug lord.
May mitug-an kanako nga lisud lang kuno sudlon ang compound nga gipuy-an niini nga drug lord kay gilibotan sa mga alalay niya nga layo pa, mopahibalo na dayon.
Apan sa ako na nga giingon, kun drug lord man ang inyong hisgotan, dili ninyo sila makuhaan og ebidensya kay dili man sila mogunit og mga shabu. Igo ra sila momando sa mga sakop kun kinsa ang hatagan.
Unya, kinsa man kaha sa ilang mga sakop nga may kaisog nga moisyu og pamahayag batok sa mga drug lord nila nga boss? Buyno, ipiyal na lang nato sa mga polis ang paghimo og kampanya.
Sa polis na lang nato ipiyal kay unsaon, aduna untay PDEA apan nagkyugpos ra man. Klaro kaayo uy kun ngano nga wala sila molihok batok sa mga drug lords. Ang mga sakop sa Regional Special Operations Group (RSOG) makahimo og ronda unya sila dili? Ngano man?
Tukma lagi g’yud ko nga angay na lang wad-on kini’ng PDEA. Dili na lang nako imantala kun unsay kahulogan sa PDEA kay pangilogan ko, nindot kaayo ang kahulogan apan walay kapuslanan.
* * *
Duna g’yuy mga senior citizens nga wala makakobra sa gipanghatag nga tag P2 mil gikan sa kagamhanan sa dakbayan kagahapon. Klaro kaayo nga ang mga seniors nga wala makakobra, wala na kini magpuyo dinhi.
Angay g’yud nga estriktohon sa City Hall nga kadto’ng dili makakobra sulod sa napulo ka adlaw sugod karong Lunes, dili na hatagan. Kadtong mga senior nga tua na magpuyo sa ubang dapit apan rehistrado gihapon dinhi sa dakbayan, wala makaari kay alkanse man sila kun moplete og daku unya P2 mil ra ang kobrahon.
- Latest
