Aron makatulog (2)

Sumpay kini sa miaging lindog nato, mahitungod sa wala’y maayong kinatulgan kay magsige og bangon mora’g gigil-asan. Unya dili na kabalik og tulog, nabuntagan nga nanglurat lang ang mga mata.

Mag-ehersisyo, apan dili na’ng hapit na ang oras sa pagtulog mo. Dali ra mahinanok kadtong mga tawo nga regular nga mag-ehersisyo. Uban sa mga gihimong pagdukiduki kalabot sa pagtulog, nagpakita nga sa hapon maoy maayong buhaton. Kun mag-ehersiyo ka nga duol na ang oras sa pagtulog mo, malagmit mopiskay hinuon ang mata nga dili na ikaw bation og duka.

Limitahe ang pag-inom sa mga adunay caffeine, alcohol ug nikotina. Kinahanglan dili molabaw sa 2 ka tasa sa kape sa usa ka adlaw. Busa wa nay sa hapon. Limitahe sab sa tsa, kolas ug tsokolate. Dali ka makatug sa alcohol pero magmata-mata ka. Makapapis kay sab ang nikotina busa ayaw og panigarilyo sa dayon o human sa katulog.

Ayaw pagkaon og maayo sa dili pa matulog. Makadisturbo sa pagtulog mo ang paghilis sa gikaon mo. Ilabi na likaye pud ang pagkao’g lamas inig hapon na. Ang init sa usa ka basong gatas, makatabang kini sa pagpahinanok nimo. Tungod kay aduna kini calcium ug magnesium nga moprodyus og melatonin nga maoy mokontrol sa tulog nga marelaks o mahinanok ka.

Ayaw sige’g  tan-aw sa relo sa bungbong. Mas maayong dili ka mahasol sa sige’g lili sa orasan nga maoy nakapaalindasay ang kabalaka sa isip mo. Ayaw na lang isab-it ang relo kun dili ka gayud niana makatulog. Lisud na basi’g mainsomya ka nga kanunay lang nga way tarung og kinatulgan sa gabii.

Ilikay ang kaugalingon sa pagbuwad sa init sa adlaw. Buhata matag sayo sa buntag nga mainitan ka bisa’g makadiyot lang. Ang kahayag sab sa adlaw daku og tabang nga makatulog kang nahinanok. Ug presko ang pamati mo sa kaugalingon inig mata sa buntag.

Labaw sa tanan, ugma na hunahunaa ang mga problema. Aron dili maapektahan ang pagtulog. Kun duna ka pay gihunahuna samtang matulog kana, magsige’g andar ang paminsar mo, maong dili ka gyud duawon sa pagduka.