Ang tawo nga walhon

Ang atong hisgutan karon mao ang tawong walhon nga ang gigamit sa pagpangusog,  pagbuhat o pagsulat mao ang iyang wala nga kamot. Matud pa sa pagtuo sa uban, supakero kuno kini sila kay kun tudloan sa husto, dili gyud mopatuo permi lang nga mobale wala o matinumanon sa iyang gusto. Kini ang tukion nato kun unsa gyud ang linihokan o panghunahuna niining mga walhon.

Ang pulong nga wala o left ( gikan sa Anglo Saxon nga lyft), nga ang kahulugan niini huyang (weak) o bungkag o buak (broken). Aduna pay mga nasud sa ubang dapit sa kalibutan nga ang batang ingon niini pagakastigohon tungod lang sa pagkawalhon.  Naa pa gyu’y mga nasud nga ang ilang pagtuo sa mga walhon, mga hugawan kay ang gigamit kuno sa paglimpyo sa lubot mao man ang wala nilang kamot. Segun sa mga gihimong pagtuon, mas daku ang purohan nga sagad sa mga walhon mahimong palahubog. Daku usab ang porsiyento nga ang inahan nga nag-edad nag 40 anyos sa pagpanganak, kalagmitan ang bata niini mahimong mga walhon.  Magkayungit ang bata sa pagsulti kun kini pugson nga tuo ang gamiton.  Daku usab ang purohan sa batang autistic nga malagmit mga walhon usab. Sagad pud niining mga walhon, dali ra sad mataptan sa allergy o hubakon.

Managlahi ang proseso sa pangutok sa tuo, kay sa walhon mga putong o daling masuko. Mubo og pailob. Dali ra mosakit ang ulo o may migraine. Apan dali ra pud mamaayo o maulian kun atakehon o maistrok. Aduna say posibilidad nga 39 porsiyento mahimo kining mga tomboy o bayot. Bisan pa man sa negatibong aspeto sa ilang pagkawalhon, aduna pud kini daghang positibong impresyon nga dili pud hibintahaan sa abilidad,  sama kang US Pres. B. Obama. Ug daghan pang sikat o mga celebrities nga walhon, sila si Bruce Willis, Julia Roberts, Angelina Jolie, Lady Gaga ug uban pa. Ang mga walhon, mahiligon sa representasyon sa mga arte. Maayong mopahigayon sa mga nagkalainlaing tahas. Sa record sa Europian Patent Office, 405 ka mga mapuslanong imbensyon hinimo sa mga walhon. Gibana-bana usab nga sa populasyon sa tibuok kalibutan, 13 porsiyento niini mga tawo nga walhon, nga nakatampo sab og mga kaugmaran.