EDITORYAL - Special treatment

Human sa iyang “voluntary submission,” napriso na niadtong Biyernes si Sen. Bong Revilla. Ang senador usa sa mga giingong nalambigit sa multi-million pork barrel scam.

Apan, pipila lamang ka oras human nga napahimutang ang senador sa iyang detention cell sa Camp Crame, miingon ang iyang asawa nga si Congresswoman Lani nga mohangyo sila sa PNP nga tugotan nga magdala og air cooler ngadto sa detention cell kay init kuno kaayo.

Angay ba nga tugotan sa PNP ang maong hangyo?

Si Senador Bong, tungod kay usa ka dakong opisyal sa nasud, angay gayud respetohon. Gani, mipasalig gayud si Dept. of the Interior and Local Government Secretary Mar Roxas nga hatagan og igong respeto ang senador.

Apan ang respeto nagpasabot ba nga himuong hayahay ang iyang kundisyon samtang napriso?

Nakabisita ba kaha si Sen. Bong ug Congresswoman Lani sa mga detention cells sa mga police stations sa bisan asang lugar dinhi sa atong nasud? Nakakita ba kaha sila nga sa detention cells pa gani, maghuot na usahay ang mga piniriso. Ang mga detention cells para sa ordinaryong mga tawo init usab kaayo ug mosamot kini ka init kung daghan silang gi detiner. Ikumpara kini sa kahimtang ni Sen. Bong nga nag-inusara sa iyang detention cell.

Kung ingon ani ang situwasyon sa mga detention cells sa ordinaryong mga tawo, samot na sa mga bilangguan. Ang mga ordinaryong tawo nga nabilanggo nag-agwanta sa kainit ug kahuot.

Kung tinuod nga serbisyo sa mga tawo ang tuyo sa mga Revilla sa ilang paglingkod sa mga tag-as nga posisyon sa gobiyerno, maikog unta sila nga manghangyo o moreklamo kung unsa ang kahimtang sa senador karon. Kay sa tinuod lang, mas hayahay pa siya ikumpara sa ubang mga piniriso.