Minugbong kasayuran (4)

Ang katawa usa kini sa epektibo nga ehersisyo, aron mapahapsay ang utok nga malikay sa kabug-at o kahago (stress) sa mga negatibong gipanghunahuna. Nga sagad maoy hinungdan sa kaaburido sa ulo kay nagtipun-og nga wala mapagawas,  ang mga problema nga gilumloman sa utok. Hangtud nga mosangpot sa daghang gipamati o panakit sa lawas. Nadiskubrehan sa mga pagtuon, nga ang pagtan-aw  sa mga pasiaw o komedya nga salida o video, makatabang sab sa pagpalig-on sa atong sistima sa imyun (immune  system).

Ang Emosyon — Kun unsa may atong gibati ug kini atong ikapahungaw, makahatag kini’g dakung benepisyo, nga mopabalanse sa atong sikolohikal o panghunahuna. Aron mogiya sa pagpahaom sa kab-oton nga tukmang disisyon. Ug mopagaan sa imong panglawas ingon nga madasigon sa positibong kinabuhi.

Ang OLEOGEL(oregano) o ADVILGEL—  Sulaye ni sa pagamit kun may alim ka sa samad o uwat-uwat aron mapatag ang kolor ini sa panit. Busloti’g dagom o alpirel nga limpyo unya ipahid o ihidhid hangtud medyo mohapdos. Obserbahe lang kun makauyon ang panit mo kun dili hiyang undangi basi’g mosamot ka ngil-ad tan-awon ang uwat.

Kun Gialimut-an — Paagasi o humoli sa tubig ang kamot hasta sa pulsohan, nga imong pataudtauran hangtud nga bation mo na ang kahayahay sa gipamati mo nga mora’g dili ka na maalimut-an bisa’g way hangin.

Ang Condom — Sa Amerika , uso kaayo didto nga mogamit og condom nga kanang komon o ordinaryo lang. Sa Uropa sad, ang condom nga ampay kaayo nila, kanang may lainlaing design ug paboritong palami o flavor, nga nindot hikapon o ganahan simhot-simhoton. Dinhi sa atoa, ang uso y-condom o way condomay, mao nga nidaghan og maayo ang nataptan sa sakit nga HIV-AIDS.

Ang Kamatis — Adunay 10,000 ka species o mga klase ang pula nga lab-as nga kamatis o red tomato sauce, may lycopene kini nga mosanta o makapaalibyo niadto nga dunay sakit nga benign prostate. Usa kini ka natural nga anti-oxidant nga mopugong sa impeksyon o pagpanghubag sa prostate. Busa himoa kini nga naa kanunay sa imong mga pagkaon matag adlaw.