Pamilya di angay bilinan og kinawat

Nangugat  ang  Ombudsman pag-awhag sa mga Filipino nga magmaisugon sa pagka-whistle blower ug mosumbong kanila kinsa ang mga opisyal sa gobiyerno nga kiriwan sa kuwarta sa kagamhanan.

Matud ni Deputy Ombudsman for the Visayas Pelagio Apostol nga kun masundog sa mga Filipino ang batasan sa taga Hong Kong nga motug-an g’yud sa mga binuang tingali dili na mogara ang mga kawatan nga opisyal sa gobiyerno.

Kun matag presidente sa nasud sinsero g’yud nga mopapriso sa mga kawatan nga opisyal, malagmit  mawagtang na ang mga kiriwan ug moasenso na ang ekonomiya sa Pilipinas.

Kay sagad sa mga opisyal may asawa ug mga anak man nga kaantigo usab mauwaw kun mapriso sila sa pangawat, busa hayan maglikay sila ug dili na mangawat.

Kun  mahunong na ang pangawat og kuwarta sa kagamhanan, angayang hatagan og dakong budget sa gobiyerno ang housing project alang sa mga eskuwater.

Kini aron uban sa kahapsay sa pang-gobiyerno, limpyo usab ang palibot sa siyudad.

* * *

Usa ka senador miingon nga kun patas-an ang suweldo sa mga opisyal sa gobiyerno dili na kuno kini mangawat og kuwarta sa kagamhanan.

Ang Espada dili motoo niini kay nahisulat na sa Biblia nga ang tawo wala’y katagbawan, bisan magsul-ob  ka pa og bulawan, ug maimo pa ang tibuok kalibotan, apan sa gihapon di ka matagbaw sa imong pagka-ikaw.

Tan-awa kining mga opisyal karon nga nalambigit sa P10 billion PDAF scam, dili ba mga kuwartahan naman  kaayo sila’ng daan?

Matud pa sa Ombudsman mao kini ang labing dakong kawat sa kuwarta sa gobiyerno sa nasud  sa tibuok kasaysayan sa Pilipinas.

Busa bisan tag P1 billion pa ang sweldo matag buwan sa opisyal, kun di sila prisuhon, mangawat gihapon sila kun makahigayon.

* * *

Kining administrasyona karon, kinsa may mga opisyal nga nakakawat gihapon og dinagko nga kantidad gikan sa panudlanan sa gobiyerno?   O kaha may naghuna-huna apan nagpanagana lang kay basin masakpan ug mahisama sa pipila na ka opisyal  nga anaa na sa prisohan.

Ang uban miingon nga mas maayo pa man nga mapriso ka sa kaso’ng murder kay sa kasong plunder kay sa plunder, mura man gud og imong gi-unay og tulis ang imong kaugalingon ug ang tanang Filipino ug gidugang nimo ang maong tinulis sa imong daghang  kuwarta.

Inigkamatay nimo imo ba nga madala ang kinawat nga kuwarta? Dili   ka ba mauwaw mopakaon sa imong pamilya pinaagi sa kinawat nga salapi? ([email protected])