Diriyot tawon mamatay

Samtang nagpatapak ako sa ligid sa akong motorsiklo sa usa ka vulcanizing shop unahan sa main entrance sa Marco Polo Hotel, nalantawan nako nga adunay gipundokan sa mga tawo sa unahan.

Nasabtan nako nga aduna diay natumba nga motorsiklo. Taud-taud, may duha ka tawo nga gikan sa dapit nga nahitaboan nga nagpaingon sa akong nahimutangan.

Ang ilang gipanagsultihan mao ang tawo nga naaksidente. Nasayran nako nga ang tawo nga nagmotor adunay kauban nga iyang anak nga maayo’ng pagkapangos. Maayo na lang kay nag-helmet ang amahan ug anak.

Kay mataud-tauran pa man nga mahuman ang pagtapak sa ligid sa akong motor, miadto ko sa naaksidente. Nakita nako ang amahan nga nag-alam-alam tawon sa iyang bata nga moundang na sa paghilak tungod sa kahapdos sa iyang pangos.

Giduol nako ang tawo ug gipangutana ngano’ng natumba siya. Ang wala maangay nga gibag-on sa pag-aspalto sa karsada maoy nakaingon. Samtang nagmaneho siya sa iyang motorsiklo, dunay kusog kaayo nga sakyanan nga diha g’yud miagi sa iyang wala nga bahin.

Sa kakulba niya, dali niya nga giliwag ang manobela paingon sa tuo aron mapalayo siya sa sakyanan, apan nadagin-as ang ligid sa wala magtupong nga karsada. Diha-diha sila nga nabagnos. Swerte na lang nga walay nagsunod nga sakyanan ug wala sila maligsi.

Gisud-ong nako pag-ayo ang karsada. Ngano man tuod kini nga ang pikas nga bahin sa karsada, habig sa atubangan sa balay ni kanhi Chief Justice Marcelo Fernan, ugdo man ang pagka-aspalto?

Bana-bana nako moabot og duha ka pulgada ang pag-ugdo kun itandi nimo sa pikas. Kun imo’ng tan-awon pag-ayo mora’g aspaltohonon pa tingali ang pikas nga bahin sa karsada atubangan sa Marco Polo Hotel apan gibiyaan lang.

 Pagkasalbahis na man sa kontraktor nga nag-undertake niini nga proyekto uy. Kun may nagsunod pa nga sakyanan dihang natumba ang motorsiklo niadto’ng amahan ug anak, naligsan na unta sila.

Kun adunahan pa ang mao nga mga biktima tingali nag-atubang na og kaso nga civil sa hukmanan kining mao nga kontraktor. Siyaro na man ‘sab uy og kamo’ng taga Department of Public Works and Highways (DPWH) nagsigi lang mo og kyogpos sa inyong mga bukton ani nga isyu?

Kanus-a pa man kamo molihok niini? Unya na ba kun may kinabuhi nga makalas? Kaniadtong miagi pa g’yud nga semana kay danglog man kaayo ang gikas-kas nga bahin unahan sa barangay hall sa Lahug, nasundan ‘sab nako ang motor nga mikaliring ‘sab tawon. Grabe na man kaayo kini nga palpak sa inyong mga kontraktor uy, unya kamo sa DPWH wala lang gihapo’y gihimo?