Klaro kaayo uy!

Gipadayon gihapon sa DPWH  nga ang mga maayo nga karsada gub-on lang g’yud pagtuyo aron usbon pag-aspalto. Unsa, nangita ra g’yud mo og project aron makaangkon og komisyon? Makapaduda na g’yud.

Napasiga ang akong mga mata kagahapon pag-abot nako sa Gorordo Avenue kay akong nakit-an nga gikaskas na ‘sab ang karsada sa kontraktor nga gikuha sa DPWH aron pag-aspalto sa karsada.

Nakapanglingo-lingo g’yud ko kay pwerte’ng nindota pa sa mao nga karsada. Anha gud ko mag-agian kada adlaw – buntag ug gabii.  Gikuhaan nako og hulagway aron matandi ang pikas nga bahin sa karsada nga pagkasinaw pa g’yud tawon kaayo. Pagka walay ayo sa mga tawo nga mihukom nga aspaltohon pag-usab kining mao nga karsada.

Unya, didto sa Veterans Drive atubangan sa Marco Polo Hotel, kapin na sa semana nga gibiyaan sa kontraktor ang gigasang-gasangan nila nga karsada.

Si Engr. Lito Catubig sa DPWH mipasalig kanako niadtong Lunes nga ipadali niya sa kontraktor ang paghuman sa mao nga proyekto sa Veterans Drive. Nganong gilangay-langay man kini?

Unya, nganong wala man magbutang og billboard ang contractor kun unsa ang ilang kompaniya nga nakadaug sa bidding sa mao nga pag-aspalto, kun pila ang kantidad ug kun kanus-a mahuman?

Kamo’ng taga DPWH nganong wala man ninyo awhaga ang kontraktor nga tumanon ang lagda? Unsa, nangatulog ra mo? Pagka wala ninyo’y ayo nga pagka opisyal.

Daghang “national roads” dinhi sa dakbayan nga bati na kaayo apan wala unaha sa pagtrabaho. Usa niini ang V. Rama Avenue dapit sa Barangay Calamba nga kun magpakusog ka’g padagan kuyawan ka nga matangtang ang ligid sa sakyanan.

Asa na man ang inyong utok? Nawad-an na mo’s maayo nga paminsar aron hukman kun asa ang maayo nga unahon? Ang M.C. Briones atubangan sa City Hall nga sinaw pa kaayo, giuna ninyo pag-aspalto. Klaro na kaayo uy kun unsa’y rason nga hasta ang mga maayo’ng karsada gi-aspalto pag-usab. Kun sa kinaraan pa, “nakita ang dispuga sa sidsid sa bestida ni Manang.”

Kun gusto mo nga duna’y maaspalto, nganong wala man ninyo giuna ang dalan Escario, ilabi na tungod nga bahin sa Barangay Hall sa Kamputhaw? Kana maoy angayan nga unahon. Wala mo kakita ana?

Ang dalan Escario usa ka national road apan nganong ang maayo nga karsada mao man hinoon ang inyong giuna? Gamita ang inyong mga utok uy!

Makapikal kaayo huna-hunaon ilabi na kun ang mga DPWH supervisors tabla ra’g nangatulog nga wala mag-monitor sa proyekto sa ilang mga kontraktor.