Kinsa ang angay’ng basulon?

Kun matulis man kining mga financial establishments nga wala magkuha og mga gwardya, ang tagdumala ra usab ang mabasol niini. Una, ayaw g’yud kamo pagdahom nga sa tanang higayon makasanta ang kapolisan sa mga pagpanulis. Timan-i nga dinhi sa dakbayan sa Sugbo wala kaabot og 1,100 ang atong kapolisan.

Ang tukma unta nga ang dakbayan angay’ng adunay 1,600 ka polis kay basi sa lagda sa mga highly-urbanized city sama sa dakbayan sa Sugbo kinahanglang adunay usa ka polis sa matag 500 ka molupyo.

Apan unsaon, apiki man sa budget, pugson g’yud? Ang mga tag-iya og balay-patigayon nga makapatintal og mga tulisan sama sa money chargers, kwarta padala, cargo forwarders, prendahanan og mga alahas, banko ug uban pa, kinahanglang duna g’yuy gwardya. Unya, kinahanglang gwardya ‘sab nga abtik ang inyong kuhaon. Dili kay gwardya nga magsige lang og basa’g Banat News ug ubang basahon. Kining mga gwardyaha nakalimot na man gud sa 11 General Orders.

Apan yuna pa, pagkanindot kaha no kun ang kahera sa gitulis nga balay-patigayon aduna pay armas unya maantigo nga mopunting? Sigurado nga “TY” unta ang maong duha ka tulisan.

Na hala, leksyon kana ninyong mga tagdumala og financial establishments nga dali ra kaayo tulison kun dili kamo magkuha og gwardya.

* * *

Lain pay ato, nakugang ko pagkabasa sa detalyi sa balita kabahin sa upat ka tawo nga nasikop kay gipasanginlang nangilad ug mipatoo nga bulawan ang ilang gibaligya.

Motoo ba kamo kun akong ingnon nga ang duha sa mga dinakpan kaniadto mga inila nga adunahan didto sa Bogo, sa wala pa kini mahimong dakbayan?

Pagkabasa nako sa ngalan nga Soledad Dy-Divinagracia nga naapil sa nadakpan, gitan-aw dayon nako kun taga diin. Pastilan, taga Barangay Cogon, Bogo.

Wala g’yud ko masayop. Si Divinagracia naila sa angga nga “Soleng” sa Bogo. Ilado kaayo nga magpapatigayon kay kaniadto siya ang tag-iya sa ESSO Gas Station, tag-iya’g mga Hacienda, daghan og mga sakyanan nga trak de karga, awto ug uban pa.

Wala na lang ko hinoon masayod unsa nay gidangatan sa iyang negosyo paglabay sa daghang katuigan kay dinhi na man ko sa dakbayan magdako.

Pastilan ‘sab uy, naa pa diay motoo kun ingnon mo nga baligyaan og binarita nga bulawan? Kadtong baga ug bug-at kaayo nga butang nga aduna pay marka nga “CAMBODIA” ug may  mga bitoon?

Mao na, dili man gud kamo magbasa-basa og mga balita ug maminaw sa radyo. Ang tunga nga bahin sa “Bar” mao ray tinuod nga gold kay gabson man na nila og ipatan-aw pa sa mga pawnshop. Ayaw pailad uy!