EDITORYAL – Luwas nga pagbiyahe sa kadagatan

Tungod kay ang Pilipinas usa man ka archipelago, ang pagsakay sa barko ang usa sa labing sikat ug sayon nga pagbiyahe padulong sa laing mga lugar. Ang problema lang kay mura man og wala gyud hatagi og igong pagtagad sa gobiyerno ang pagsiguro nga luwas ang pagbiyahe sa kadagatan.

Karong semanaha lang, dunay usa ka barko nga milarga na unta gikan sa Port of Cebu apan naguba ug gikinahanglan nga mobalik sa pantalan. Niadtong Enero, ubay-ubay nga mga barko ang nangasangad. Sa miaging tuig, duha ka barko, ang St. Thomas Aquinas sa 2GO Shipping ug ang Sulpicio Express Siete sa Span Asia, ang nagbangga ug miresulta sa kamatayon sa gatos kapin ka pasahero. Aduna pa'y daghan kaayo nga aksidente sa kadagatan sa mga miaging tuig, ang uban luwas ra ang mga pasahero ug ang uban, duna gyu'y nangamatay. Naa pa man gani mga nagpabiling missing hangtod karon.

Tuod, dunay mga imbestigasyon nga nahitabo, ug mga kompaniya sa barko nga nasuspenso. Pero unsa ma'y nahitabo pagkahuman? Duna ba'y mga lakang o kausaban nga gipatuman sa gobiyerno aron dili na mausab ang maong mga aksidente sa kadagatan? Gihugtan ba ang pag-inspeksyon sa mga barko aron kalikayan ang mga aberya? Kun human error ang hinungdan sa aksidente, duna ba'y re-training sa tripulante nga nasayop?

Wala. Inig kahuman sa imbestigasyon ug pagsuspenso sa kompaniya, mahilom ra ang issue. Matuki lang kini og balik kun aduna na usab laing aberya o disgrasya ba kaha.

Mao na nga dili na angay ikatingala nga ang problema sa aksidente o aberya sa mga barko magbalikbalik ra gyud. Masulbad lang kining problemaha kun hatagan na gyud og igong pagtagad ang luwas nga pagbiyahe sa kadagatan ug dunay mga konkreto nga kausaban nga ipatuman sa gobiyerno.

Makapadismaya lang nga samtang naghuwat ang katawhan sa aksyon sa gobyerno, ang mga sumasakay og barko ang nag-antos.