Baka ‘savings’ ngayon?

Lahat nagsasabing tiyak balewala

Mga imbestigang ngayo’y ginagawa –

Sa mga anomalyang naganap sa bansa

Ng mga senador saka kongresista!

Una’y sa nabistong pork barrel sa Congress

Na sabi’y wala na ay hindi naalis;

Ito’y naging PDAF na nakakainis

Pagka’t pera natin tuloy ang pagwalis!

Sinundan pa ito ng bagong imbento

Ng mga nariyan sa ating Kongreso;

Lumitaw ang DAP at saka ang SARO

Ngayo’y ‘STIMULUS’ doon sa Kongreso!

Parang mina-magic ang pera ng bayan

Na bagong imbento ng pamahalaan;

Ang susunod dito’y nawala na lamang

Ang malaking pondo sa Kabisayaan!

Hindi lamang milyon kundi bilyun-bilyon

Pumasok sa bansa na mga donasyon;

Mga bilyong dolyar – nasaan na ngayon

Sa ating palitan laksa’t trilyun-trilyon?

Mga perang ito’y tiyak sasabihin:

Ito’y nakatago’t sa gobyernong “savings”

Savings – ibibigay ng gobyerno natin

Sa piling candidates – halalang darating!