Ang remedyo sa allergy

Hasol gyud kun may allergy ka, labi nag sige’g ping-ot, atse, agas ang ilong ug sakit ang tutonlan nga kaubhonon. Ang remedy ini naa ra nimo, mas duol pa sa imong gihunahuna. Oo,naa ra ni sa lababo sa kusina mo. Kining mga sintomas mo sa allergy, mahimong timailhan lang kana nga ikaw giuhaw.

Mao kini ang opinion ni Dr. Fereydon Batmanhelidj, nagsulat sa libro nga “Your Body’s Many Cries for Water”. Misugyot siya nga aron pagsanta sa kahasol sa allergy, kinahanglan nga moinom gyud og daghang tubig. Kay may sustansya kining nagkontrol sa sistima sa tubig nga giinom, nga ginganlan og Histamine. Kun di ka moinom og igong tubig unya kulang sa tubig ang lawas, igawas kadtong nanubrang  histamine nga napundo para magamit sa lain.

Mao nga magluhaluha ang mga mata ug may tubig nga mogawas sa ilong. Ang masulod dayon sa hunahuna mao nga motumar og anti-histamine. Si Dr. Batmanhelidj nagtuo nga mahimong delikado kini, kay may laing epekto ni sama sa nag-uga ang ngabil, labad sa ulo, malipong ug kasukaon tungod kay nahilabtan ini ang natural nga pag-ayo sa problema. Niya pa sulayan nato kini:

(1) Inom og tubig labing menus 6-8 ka baso kada-adlaw – Kanang puro tubig way alcohol, tsa, kape o cola. Limitahan ang orange juice, kay taas nig potassium, nga maoy nagpataas sa produksyon sa histamine kay sa gikinahanglan. Magdala’g tubig kun molakaw aron permi may mainom. Angay moinom 1 ka baso ka da 1.1/2 sa oras sa di pa mokaon. Unya dungaga’g laing 1ka baso kada 2.1/2 sa oras  human sa kaon. Pun-an pa gyud og 2ka baso sa dili pa matulog sa gabii.

(2) Ablihi ang kitchen cabinet, dili ang medicine cabinet – Kuhaa kanang mas menus pa sa mapalit mong anti-histamine sa botika. “Ang asin,” matud ni Batmanghelidj, “maoy usa ka natural nga anti-histamine.”Kadtong may allergy nagkinahanglan pag igong asin aron pagsanta sa sobrang produksyon sa histamine sa atong lawas.

(3) Pailobi nga di magdali –sa pagtuo nga kun lumsan karon sa tubig mamaayo kana.Nagkinahanglan pa ni’g panahon nga igong mahumol sa tubig ang mga selyula,una ka makabatyag og maayong epekto.