PNoy nganong gibiyaan mo ako

Silyado na ang patakaran sa gobiyerno nga maghimong pribado sa mga tambalanan nga iyang gipadagan. Kini human magkasabot ang gobiyerno ug pribadong korporasyon nga Megaworld-Wide Citi Consortium sa pagpadagan sa Philippine Orthopedic Center nga nahimutang sa Quezon City sa kantidad nga 5.69 bilyones ka pesos. Ang Philippine Orthopedic Center aduna kini 700 ka higdaanan nga pangpublikong tambalanan nga nagsilbing sentro sa mga na-trauma ug orthopedic nga mga pasyente.

Tungod sa paghimong pribado sa nahisgotang tambalanan, ang 6,000 ka  pasyente niini diin ang 80 porsiyento mga kabus ang wala na unya’y ka paingnan matud pa ni Senador Koko Pimentel.

Sa dili madugay mahimo na usab unyang pribado ang Vicente Sotto Memorial Medical Center nga nahimutang sa  dalan B. Rodriguez, dakbayan sa Sugbo kay usa usab kini sa giplanohang himuong pribado.

Ang pinakarason nganong himuong pribado sa gobiyerno ang iyang mga tambalanan mao nga alkanse ang operasyon niini. Dinhi atong makita nga dili diay serbisyong medical ang nag unang rason sa gobiyerno sa pagpabarog og mga tambalanan  kun dili negosyo.

Samtang atong giila nga mas maayo usab nga mokita ang mga pangpublikong tambalanan sa ilang operasyon aron makabarog kini sa iyang kaugalingon apan wala kini magpasabot nga himuon kining pribado kay wala mokita sa iyang operasyon. Angayang hinumduman sa mga nagpasiugda sa paghimo nga pribado sa mga tambalanang publiko nga serbisyong medikal ang una ug ikaduha lang ang kita.

Ang serbisyong medikal katungod sa tawo isip kabahin sa iyang katungod sa pagpakabuhi busa dili kini angayang himuon sa gobiyerno nga optional lamang. Ang serbisyong medikal usa ka batakang panginahanglan sa tawo nga adunay katungod nga mabuhi busa dili kini puwede nga ihikaw.

Sa Pilipinas, dili ka mamatay sa sakit kun dili mamatay ka sa kamahal sa tambal. Busa angay ug matarong lamang gayod unta nga ang iyang gobiyerno maningkamot nga mamahimong barato ang iyang serbisyong medikal inay kay iyang pamahalon pinaagi sa paghimong pribado sa iyang mga pangpublikong tambalanan.

Sa pagtugot nga mahimong pribado ang mga pangpublikong tambalanan, gibiyaan sa gobiyerno ni Pangulong Noynoy (PNOY) ang iyang responsibilidad sa paghatag og barato o libre nga serbisyong medikal sa iyang katawhan.